Amal Abışov: “Nə basketbolçu, nə də futbolçu yetişdirə bilirik”

Jurnalist Amal Abışov Elm və Təhsil naziri, eyni zamanda Azərbaycan Basketbol Federasiyasının prezidenti Emin Əmrullayevin jurnalistlərdən birinin sualına verdiyi cavabı tənqid edib.

Citypost.az xəbər verir ki, Amal Abışov bildirib ki, bəzi nazirlər və məmurlar əvvəlcədən hazırlanmış suallara cavab verməyə öyrəşdikləri üçün gözlənilməz suallarla qarşılaşanda çətinlik çəkirlər.

“Bizim nazirlər, məmurlar əvvəlcədən hazırlanmış suallara cavab verməyə o qədər öyrəşiblər ki, qəfil köntöy sual eşidən kimi özlərini itirirlər. Elm və Təhsil naziri, eyni zamanda da Basketbol Federasiyasının prezidenti Emin Əmrullayevin də başına bu gün iş gəlib”, – deyə jurnalist yazıb.

Onun sözlərinə görə, jurnalistlərdən biri Emin Əmrullayevə “Əhalisinin 2/3-sinin oxuduqlarını anlamadığı bir ölkədə basketbolu inkişaf etdirmək nə dərəcədə çətindir?” sualını ünvanlayıb.

Amal Abışov qeyd edib ki, Emin Əmrullayev suala sərt reaksiya verərək jurnalistdən növbəti dəfə normal sual verməsini istəyib. Jurnalistin sözlərinə görə, nazir həmçinin yaxşı basketbol oynamaq üçün uzunboylu olmağın vacib olduğunu bildirib.

“Bərəkallah, Emin müəllim. Ona qalsa, gərək bütün uzunboylular basketbol ulduzu olsunlar. Oxuduğunu anlamayan adam heç yaxşı basketbolçu da ola bilməz”, – deyə Amal Abışov bildirib.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Jurnalist Azərbaycan basketbolunun inkişaf perspektivləri ilə bağlı da tənqidi fikirlər səsləndirib. O, hesab edir ki, ölkədə basketbolun inkişafı ilə bağlı problemlər həll olunmadığı təqdirdə futbolda olduğu kimi, legionerlərdən geniş istifadə oluna bilər.

“Siz də bilirsiniz ki, Azərbaycanda basketbolu inkişaf etdirə bilməyəcəksiniz və orada da futboldakı kimi əlac kütləvi legionerləşdirməyə qalıb. Həmin legionerlər də potensial valyuta daşıyıcılarıdır. Azərbaycanın pulu xaricə daşınır. Biri futbolçu kimi, digəri basketbolçu kimi”, – deyə jurnalist yazıb.

Amal Abışov paylaşımının sonunda təhsil və idman sahəsində mövcud problemləri ümumiləşdirərək qeyd edib:“Biz isə nə normal oxuduğunu anlayan vətəndaş yetişdirə bilirik, nə də basketbolçu ilə futbolçu!”