Şəbnəm Qarslı: “Türkiyədə güclü Azərbaycan diasporası və lobbi formalaşdıra bilmədik”

Jurnalist Şəbnəm Qarslı Türkiyədə Azərbaycan diasporunun fəaliyyəti və lobbiçilik məsələləri ilə bağlı fikirlərini bölüşüb.

Citypost.az Şəbnəm Qarslı bildirib ki, son 10 il ərzində Türkiyədə Azərbaycan diasporası və lobbi fəaliyyətləri barədə ara-sıra yazılar yazıb. Onun sözlərinə görə, bu mövzuda hər dəfə “eyni millətik, bizi bilirlər, buna nə ehtiyac var?” kimi reaksiyalarla qarşılaşıb.

“Son bir ildir izləyirsiniz, görürsünüz nə ehtiyac olduğunu. Türkiyə cəmiyyətində fikir formalaşdıran fərqli qruplar var ki, Azərbaycan əleyhdarlarıdır və əllərinə fürsət düşən kimi istifadə edirlər”, – deyə o yazıb.

Şəbnəm Qarslı bu qruplara “irançılar, ümmətçilər, sol aydınlar, etnik azlıqlar və s.”nin aid olduğunu bildirib. O qeyd edib ki, onun fikrincə, Azərbaycan son 35 ildə Türkiyədə bu qruplara qarşı təsirli diaspora və lobbi formalaşdıra bilməyib.

Onun sözlərinə görə, Qənirə Paşayevanın sağlığında Türkiyədə Azərbaycan diasporunun təsir gücü daha çox hiss olunurdu. Hazırda isə imkanları məhdud olsa da fəaliyyət göstərən bir neçə şəxsin qaldığını bildirib.

“İndi isə pərakəndə, yetərli qədər təsir imkanı olmasa da, əlindən gələni fədakarcasına ortaya qoyan bir neçə şəxs qalıb, onların da edə biləcəyi maksimum budur. Çünki yetərli dəstəyi görmürlər. Şəxsi münasibətlər zəminində bir-birini yeyən qruplara və şəxslərə bölünüblər”, – deyə Qarslı qeyd edib.

Şəbnəm Qarslı bildirib ki, Türkiyədə Azərbaycan diasporunun fəaliyyətinin gücləndirilməsi üçün yol xəritəsi mövcuddur və sistemli şəkildə görülə biləcək işlər məlumdur.

“Əslində yol xəritəsi var, bunun üçün nələr edilə bilər, hansı sistematik işlər görülə bilər, bilirik. Tələb olduğu zaman, dost ortamında paylaşırıq, amma çifayda”, – deyə o vurğulayıb.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Onun sözlərinə görə, Azərbaycan dövləti, xüsusilə dövlət başçısı səviyyəsində Türkiyədə diasporanın güclü olmasında maraqlıdır. Lakin Qarslı hesab edir ki, Türkiyədə fəaliyyət göstərən şəxslərin seçimləri, layihələri və gördükləri işlər gözlənilən nəticəni verməyib.

“Bu günə qədər burada seçilmiş şəxslərin də mənasız və yararsız olduğunu, görülən işlərin faydalılıq əmsalının yetərsiz olduğunu rahatca iddia edə bilərik. Əksi olsaydı, indi ən yaxın qonşu müttəfiq dövlətin kamuoyunda bizi bu günə qoymazdılar”, – deyə Şəbnəm Qarslı yazıb.

Şəbnəm Qarslı sonda Türkiyədə Azərbaycan diasporunun fəaliyyətinin gücləndirilməsi üçün gec olmadığını bildirib.

“Gecdir, amma son deyil. Bir yerdən başlamaq lazımdır, dostlar. Yenə şükür edin ki, Türkiyədə hökumət bizdən yanadır. Seçimdə dəyişiklik olsa, bu münasibət də qalmayacaq, bu günə şükür edəcəyik”, – deyə o qeyd edib.

Turan