"Azərpoçt" işçiləri qəzalı binada işlədir - ŞİKAYƏT

Bakının Səbail rayonunda bağlanan poçt şöbəsi qalmaqala səbəb olub.

 

Bu barədə Citypost.az-a ərazidə yaşayan sakinlər məlumat verib.

 

Məlumata görə,Səbail rayonu,20-ci sahə adlanan ərazidə ,Salyan yolu 10/23 ünvanında yerləşən 23 saylı poçt şöbəsinin qeyri-müəyyən səbəbdən bağlanması narazılıq yaradıb.
Uzun müddətdir ki, sözügedən poçt şöbəsi həmin  ünvanda  fəaliyyət göstərib. Ərazidə əhalinin sıx məskunlaşmasını nəzərə alsaq, poçt şöbəsinin bağlanması həqiqətən  də  o ərazidə  yaşayan  sakinlərin  çətinlik  çəkməsinə  səbəb  olacaq.

 

Poçt şöbəsinin üzərində müvəqqəti təmirə bağlanır lövhəsi asılsa da, orada heç bir  təmir  işləri  görülmür. Sakinlər  isə   başqa  söz  deyir.

 

Vətəndaş Ellada Bayramovanın sözlərinə görə,sözügedən poçt şöbəsi burada 50 ildən artıqdır ki, fəaliyyət göstərir.

 

“Burada əhali sıx məskunlaşıb.Hər kəs də bu poçt şöbəsindən istifadə edir. 1 aydan artıqdır ki, buranı təmir adı ilə bağlayıblar. Deyirlər ki, guya bina qəzalı vəziyyətdədir.Bina qəzalı vəziyyətdədirsə,içərisində əməkdaşlar niyə oturub? Onlar nə iş görür orada?Üstəlik,qəzalı vəziyyətdə olan binanın üstündə uşaq bağçası ,yanında uşaq dərnəyi olarmı? Hazırda həmin uşaq bağçası  və dərnək işlək vəziyyətdədir.”,- deyə  sakin  bildirib.

 

Yerli sakinlərdən aldığımız məlumata görə, poçt şöbəsinin bağlanmasına səbəb  kimi  binanın  elektrik  xətlərində olan problem  göstərilir.

 

Ərazidə yaşayan vətəndaşlar onlara xidmət üçün təklif olunan poçt şöbəsinin uzaqda yerləşməsini və onlar üçün əlverişsiz olduğunu bildiriblər.

 

“Bizi  Badandarda yerləşən 4 saylı poçt şöbəsinə yönləndirirlər. Ora isə bizdən uzaqdır.Öz poçtumuz olduğu halda, niyə bu qədər məsafə qət edib,ora getməliyik?”,-deyə sakinlərdən biri əməkdaşımıza bildirib.

CityPost.az--ın əməkdaşı vətəndaşların narazılığı ilə bağlı Rəqəmsal İnkişaf və Nəqliyyat Nazirliyinə məxsus “Azərpoçt” MMC-nin ictimaiyyətlə əlaqələr şöbəsinə sorğu ünvanlayıb.
Şöbənin müdiri Afaq İbrahimovanın sözlərinə görə, poçt şöbəsinin inzibati binası hazırda istismara uyğun deyil.

“Nəzərinizə çatdırmaq istəyirik ki, Səbail rayonu, Salyan yolu 10/23 ünvanında fəaliyyət göstərən AZ1023 indeksli poçt şöbəsinin inzibati binası hazırda istismara uyğun deyil.
Belə ki, binada elektrik xətləri və kanalizasiya sistemi istifadəyə yararsız olmaqla yanaşı, həm də qəzalı vəziyyətdədir. Məntəqədə tez-tez qısa qapanmalar müşahidə olunur, eləcə də subasmalar baş verir. Şöbədə elektrik xətlərində yaranan qısaqapanma yanğın təhlükəsi yaradır ki, bu da şöbədə xidmət göstərən əməkdaşlar üçün, eləcə də xidmət alan vətəndaşlar həyatını təhlükəyə atmaq, o cümlədən xidmət keyfiyyətinin çox ciddi şəkildə aşağı düşməsi deməkdir”,-deyə Afaq İbrahimova bildirib.

“Azərpoçt”un sözçüsü həmçinin sözügedən poçt şöbəsinin bağlanmayacağını da vurğulayıb.

 

“Bütün bunlar nəzərə alınaraq, məhz  həmin inzibati binada poçt şöbəsinin vətəndaşlara xidmət göstərilməsi müvəqqəti dayandırılıb. Xidmətlərin icrası yaxınlıqdakı  digər AZ1004 indeksli şöbəyə həvalə edilib və bu barədə məlumat əhali ilə paylaşılıb. 

Şöbənin fəaliyyətinin müvəqqəti dayandırılması isə onun  bağlanması demək deyil. Hazırda paralel olaraq binada cari təmirin həyata keçirilməsi nəzərdə tutulur. Bununla yanaşı, əməkdaşların daha yaxşı şəraitdə çalışması və vətəndaşlara keyfiyyətli xidmətin göstərilməsi üçün həmin poçt  şöbəsinin  fəaliyyətinin digər  məkanda  davam etdirilməsi imkanları da tərəfimizdən araşdırılır.”,- deyə O, bildirib.

 

Miri Məcidli