Mətbəxdəki paketlərin gizli həyatı: Niyə əlinizə həmişə cırıq paketlər düşür?

Bəzən gündəlik həyatda elə xırda, amma qəribə hadisələrlə qarşılaşırıq ki, onların üzərində bir qədər düşündükdə hər şey daha da müəmmalı görünməyə başlayır. Məsələn, mətbəxdə qapının arxasında, bir küncdə və ya xüsusi paketlikdə yığılan plastik torbaları götürmək məsələsi. Evdə onlarla, hətta yüzlərlə paket ola bilər, amma nə vaxtsa sizə bir paket lazım olanda əlinizə gələnlərin böyük əksəriyyəti ya cırıq olur, ya qulpu qopub, ya da əvvəllər hansısa ağır məhsul daşındığı üçün dibində deşik açılıb.

Citypost.az-ın məlumatına əsasən , ən maraqlısı isə odur ki, sağlam paketlərin harada gizləndiyini heç kim dəqiq bilmir. Sanki həmin paketlər öz aralarında gizli bir razılaşma əldə edib və ən sağlam olanlar həmişə yığının ən dərin qatına çəkiliblər. Siz isə hər dəfə ümidlə bir paket çıxarırsınız, baxırsınız ki, cırıqdır. Birini də götürürsünüz – onun qulpu yoxdur. Üçüncünü çıxarırsınız – dibində deşik var. Dördüncü isə o qədər nazikdir ki, içinə iki kilo ərzaq qoysanız, artıq taleyinizlə vidalaşmağa hazır olmalısınız. Əslində, mətbəxdəki həmin paketlik adi bir saxlama yeri deyil. O, sanki evdəki plastik kast sistemini idarə edən gizli bir arxivdir. Burada hər paketin öz statusu, öz tarixi və öz taleyi var.Ən yuxarıda adətən bir-iki dəfə istifadə edilmiş, nisbətən sağlam paketlər dayanır. Onlar ailənin gözündə “yaxşı paketlər” hesab olunur. Lakin qəribə şəkildə heç kim onlara toxunmur. Çünki həmin paketlər “sonra lazım olar” kateqoriyasına aid edilir. Beləcə, sağlam paketlər aylarla, bəzən illərlə qorunur.Aşağı təbəqədə isə cırıq, qulpu qopmuş, bir tərəfi əzilmiş və ya artıq funksiyasını böyük ölçüdə itirmiş paketlər yerləşir. Sizə lazım olan anda sistem məhz həmin paketləri önə çıxarır. Siz sağlam bir paket axtarırsınız. Əlinizi yığının içinə salırsınız. Birini çəkirsiniz – cırıqdır. Başqasını götürürsünüz – qulpu qopur. Daha birini çıxarırsınız – paketin dibində o qədər böyük deşik var ki, artıq onu paket adlandırmaq belə mübahisəlidir.

Bu məqamda insanın səbrinin sınandığını hiss etməməsi mümkün deyil.Sanki həmin paketliyin qarşısında görünməz bir mexanizm fəaliyyət göstərir. Sistem sizin əlinizə bilərəkdən ən yararsız paketi verir. Məqsəd isə sizi tədricən ümidsizliyə salmaqdır. Bir neçə uğursuz cəhddən sonra artıq insan “Boş ver, gedim bazar torbasını götürüm” deyir.

Məhz bu da paketlik sisteminin əsas qələbəsidir.Amma məsələ bununla bitmir. Evdə sağlam paket tapıldıqda da vəziyyət dəyişmir. Çünki həmin paket dərhal xüsusi status qazanır. “Bunu atma, lazım olar” deyilir. Paket bir kənara qoyulur və qorunmağa başlayır. Nə üçün lazım olacağı isə heç vaxt dəqiq bilinmir. Bəlkə sabah zibil atmağa lazım olacaq. Bəlkə bazara gedəndə istifadə ediləcək. Bəlkə evdə nəsə saxlamaq üçün işə yarayacaq. Bəlkə də ümumiyyətlə heç vaxt lazım olmayacaq. Amma onu atmaq mümkün deyil. Çünki o, sağlam paketdir.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Beləliklə, evdə qəribə bir paradoks yaranır: ən yararsız paketlər gündəlik istifadəyə məhkum edilir, ən sağlam paketlər isə toxunulmaz elan olunur.Bəzən həmin paketlərdən biri xüsusi olaraq seçilir və “bu yaxşıdır, bunu saxla” deyə ayrıca bir yerə qoyulur. Sonra həmin paket o qədər yaxşı qorunur ki, bir neçə ildən sonra artıq onu istifadə etməyə heç kimin ürəyi gəlmir.Digər tərəfdən, cırıq paketlərin də öz həyatı var. Onlardan biri çörək almağa gedir, biri zibil qabına xidmət edir, digəri ayaqqabı saxlamaq üçün istifadə olunur, başqa biri isə artıq son missiyasını başa vuraraq zibil qutusuna yollanır.

Beləliklə, bir vaxtlar mağazadan gətirilən adi plastik paketlər zaman keçdikcə ev təsərrüfatının ayrılmaz üzvünə çevrilirlər.Bütün bunların ən maraqlı tərəfi isə odur ki, insan nə qədər paket yığsa da, lazım olan anda yenə paket tapa bilmir. Sanki evdəki paketlərin sayı ilə onların istifadəyə yararlılığı arasında qəribə bir qanunauyğunluq var. Paket çoxaldıqca sağlam paketlərin sayı azalır.Ona görə də növbəti dəfə mətbəxdə paket axtararkən əlinizə cırıq və qulpu qopmuş bir torba gəlirsə, əsəbiləşməyin. Ola bilsin ki, məsələ heç də sizin bəxtinizlə bağlı deyil. Bəlkə də mətbəx qapısının arxasında illərdir öz qaydaları ilə işləyən nəhəng bir plastik sistem mövcuddur.Və bu sistemin dəyişməyən bir prinsipi var: siz sağlam paket axtardıqca qarşınıza mütləq cırıq paket çıxacaq.Çünki paketlərin də öz dünyası var. Sağlam olanlar qorunur, yararsız olanlar istifadə edilir, heç kimə lazım olmayanlar isə “bir gün lazım olar” ümidi ilə illərlə saxlanılır. Sonda isə bütün bu sistemin ən böyük qalibi yenə də o köhnə bazar torbası olur. Çünki siz nə qədər paket axtarsanız da, nəhayət, səbriniz tükənir və onu götürüb evdən çıxırsınız.

Yeganə