Şöhrət Eldəniz İlham Əliyevin sözlərini belə şərh etdi: “Dövlət artıq teatrdan yorulub”

Prezident İlham Əliyevin YAP-ın qurultayında dediyi ən sərt cümlə əslində bu idi: "Şablonlardan, formal xarakter daşıyan tədbirlərdən əl çəkmək vaxtı gəlib çatıb". Bu, 30 illik idarəetmə sisteminə verilən diaqnoz idi. Prezident açıq deyir ki, dövlət artıq teatrdan yorulub. 

Şablon nədir? Şablon odur ki, məsələn hansısa rayonun icra başçısı Bakıdan yüksək çinli qonaq gələndə dərhal əmr verir yolu süpürürlər, ağacları rəngləyirlər, məktəbliləri 3 saat günün altında saxlayırlar və sair. Qonaq gedir, hər şey yenə əvvəlki kimi olur. Bu, formal tədbirdir. Və yaxud yığışıb ildə 4 dəfə eyni şəxşlər eyni məruzəni oxuyur, şəkil çəkdirib yuxarı hesabat göndərirlər ki, "tədbir keçirdik". Ortada heç bir nəticə yoxdur. Bu, şablondur.

Və yaxud bir məmur sosial şəbəkədə bir problem görəndə onu həll etmək əvəzinə, "araşdırılır" deyə şablon cavab yazır. Bu, formal yanaşmadır.

Prezident deyir ki, bu dövr bitdi. Çünki bu şablonlar dövlətə ziyan vurur. Bəs niyə indi dedi?

Çünki ölkə artıq başqa mərhələdədir. 44 günlük müharibəni şablonla qazanmaq olmazdı. Orda hər gün real qərar lazım idi. Formal hesabatla Şuşa alınmırdı. Prezident eyni reallığı indi sülh dövrünə gətirmək istəyir. Sosial şəbəkə dövründə sən formal tədbir keçirib, 10 şəkil çəkdirib iş gedir deyə bilməzsən. İnsanlar o şəkillərin arxasındakı boşluğu dərhal görür. Ən böyük ideoloji təhlükələrdən biri də elə budur. Prezident çıxışında açıq dedi ki, indi müharibə səngərdə deyil, beyinlərdə gedir. Kiberhücum, süni intellekt, xaricdən maliyyələşən dini şəbəkələr, TikTok-da yayılan dezinformasiya və sair. Bunlarla formal tədbir ilə mübarizə apara bilməzsən. Gərək real ideya, real iş ortaya qoyasan. Bəs Prezident nə istəyir? 

Bu cümlə ilə o, YAP-a və bütün məmur sinfinə 3 tapşırıq verir. 

Bir. Hesabat üçün yox, nəticə üçün işləyin. Mənə neçə tədbir keçirdiyinizi deməyin. Deyin ki, neçə gənci işlə təmin etdiniz, Qarabağa qayıdan ailənin neçə problemini həll etdiniz. Tədbir sayı yox, nəticə vacibdir. 

İki. Xalqın ayağına gedin, onları öz ayağınıza gətirməyin.

Formal tədbir odur ki, sən zalı doldurub camaatı məcbur gətirirsən. Real iş odur ki, sən kəndə gedirsən, o ailənin qapısını döyürsən. Prezidentin özü 20 ildir məhz bunu edir. Hər ay Qarabağda sadə vətəndaşlarla gedib görüşür, onların problemlərini eşidir, iş yerləri açır, bərpa işlərinə nəzarət edir, hərbçilərlə baş çəkir və sair. Və deyir ki, siz də bu cür işləyin.

 Üç. Partiya və məmurlar dövlətin yükü yox, dayağı olsun. YAP 800 min üzvü olan nəhəng maşındır. Əgər bu maşın ancaq şablon tədbirlərlə məşğul olsa, bu, dövlətin belində yükdür. Amma əgər bu maşın hər kənddə ideoloji dayağa, sosial şəbəkədəki hər yalana cavab verən real qüvvəyə çevrilsə, onda bu, dövlətin ən böyük silahıdır. Yəni şablonlardan əl çəkmək çağırışı əslində Prezidentin bütün sistemə dediyi ayılın siqnalıdır. Prezident deyirki, biz torpağı şablonla azad etmədik, qanla azad etdik. İndi də o torpağı saxlamaq, o torpaqda dövlət qurmaq şablonla olmayacaq. Kim köhnə qaydada, lent kəsməklə, şəkil çəkdirməklə, yalan hesabatla işləmək istəyirsə, o artıq yeni Azərbaycanın adamı deyil.

Zaman real iş görənlərin zamanıdır.

Şöhrət El-Dəniz.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ