Kənan Rövşənoğlu: “Dövlət vətəndaşlarının ona olan inamı qədər güclüdür”

Jurnalist Kənan Rövşənoğlu ölkədə baş verən proseslərlə bağlı fikirlərini bölüşüb. O, kütləvi təbliğatın cəmiyyətə təsirindən və totalitar düşüncənin hələ də güclü olmasından məyus olduğunu bildirsə də, ümidini itirmədiyini vurğulayıb.

Citypost.az xəbər verir ki, Jurnalist bu barədə sosial şəbəkə hesabında yazıb.

Kənan Rövşənoğlu qeyd edib ki, tanıyanlar onun hər zaman, hər mövzuda ağlın, məntiqin və sağlam düşüncənin üstün gələcəyinə inandığını bilirlər.

“Neçə gündür müxtəlif təbəqələrdən insanlarla ünsiyyətdə oluram, insanlar maraqlanır, bu gedişatın hara gedəcəyini soruşur. Hələ də ümid edirəm, dövlətin hansısa yerlərində oturan vətənpərvər, müdrik insanların ağılsəlim, müdrik qərar verəcəyinə ümidimi itirməmişəm, sabah və ya qarşıdakı günlərdə bu mənasız, məntiqsiz, ölkəni, xalqı məyus edəcək qərardan geri addım atılacağına – hansısa bir formada – ümid edirəm.

Bu düşüncəmi dostlarla bölüşmüşəm, hətta insanlara ümid vermişəm. Çünki özüm də dövlət başçısının bu vəziyyəti dəyişəcəyinə hələ də ümid edirəm”, – deyə jurnalist bildirib.

Kənan Rövşənoğlunun sözlərinə görə, dövlətin gücü vətəndaşlarının ona olan inamı və etimadı ilə sıx bağlıdır.

“Çünki bəzi şeylər gözlə görülmür, əllə tutulmur. Dövlət öz vətəndaşlarının ona olan inamı, etimadı qədər güclüdür”, – deyə o vurğulayıb.

Jurnalist hesab edir ki, mübahisə doğuran qərarın icrası əhalinin böyük bir qisminin öz dövlətinə olan inamını və güvənini sarsıda bilər. Onun fikrincə, bu halda insanların daxilindəki “öz dövlətim məni atmaz” düşüncəsi zədələnəcək.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Kənan Rövşənoğlu qeyd edib ki, bu narazılıq mütləq küçə etirazları və ya açıq qarşıdurma formasında özünü göstərməyə bilər. O, Azərbaycan dindarlarının baş verənlərin ölkə daxilində və xaricində siyasi oyunlar üçün materiala çevrilməsinə imkan verməyəcəyini düşündüyünü bildirib.

“Amma səssiz və sakit şəkildə inciyəcək, öz dövlətindən küsəcək, səssiz və sədasız”, – deyə jurnalist yazıb.

O, həmçinin vurğulayıb ki, insanların inancına və dini həyat tərzinə məhdudiyyət qoyulması, onların inanclarına görə sınağa çəkilməsi, qızların və qadınların baş örtüyünün zorla açılması cəmiyyətdə dərin iz buraxa bilər.

“Azərbaycan insanı ümidini itirəcək, öz dövlətinin onun inancını yaşamasına, Allahın, Peyğəmbərin (s) buyurduğu kimi həyat sürməsinə məhdudiyyət qoymasına, inancı ilə imtahan edilməsini, qız və qadınlarının başının zorla açılmasını unutmayacaq, içində sarsılacaq. Bunu kənarda görməyəcəksiniz, amma bu olacaq”, – deyə o qeyd edib.

Bununla belə, jurnalist haqqın, doğrunun, ağlın və müdrikliyin üstün gələcəyinə inandığını bildirib.

“Buna görə də mən hələ də ümidimi itirməmişəm, haqqın, doğrunun, ağlın, müdrikliyin üstün gələcəyinə, qaranlığın məğlub olacağına inanıram. Sona qədər ümidimi itirməyəcəm. Bu xalq tarixinin bir çox dövrlərində qaranlıq günlər yaşayıb, bir daha yaşamasına inanmıram, inanmaq istəmirəm”, – deyə Kənan Rövşənoğlu yazıb.

Turan