Arzuman Abdulkərimov: Fikir ayrılıqları qardaşlığı sarsıtmamalıdır

  Azərbaycan və Türkiyə iki müdrik liderin rəhbərlik etdiyi, taleləri, tarixi, dili, mədəniyyəti və ortaq yaddaşı ilə bir-birinə bağlanmış iki qardaş dövlətdir.

  Son günlər baş verən proseslər isə bir həqiqəti üzə çıxarır: iki qardaş ölkə arasında yaranan hər fikir ayrılığını fürsətə çevirərək onu böyük bir qarşıdurmaya çevirmək istəyənlər var. Sanki pusqudaymışlar, sanki illərdir bu günü gözləyirmişlər. Bir mübahisənin qığılcımını alova çevirmək, sosial şəbəkələrdə qarşılıqlı ittihamları qızışdırmaq, azərbaycanlını türkiyəlinin, türkiyəlini azərbaycanlının qarşısına çıxarmaq üçün fürsət axtarırlar.

Hər iki tərəfdə özünü vətənpərvər göstərən, amma birliyin ən həssas nöqtələrini hədəfə alan buqələmunlar anlamalıdırlar ki, Azərbaycan-Türkiyə qardaşlığı hansısa siyasi partiyanın, hökumətin, siyasətçinin və ya sosial şəbəkə fəalının şəxsi mülkü deyil. Bu qardaşlıq nəsillərin yaddaşında, ortaq tariximizdə, dilimizdə, mədəniyyətimizdə və ən çətin günlərdə bir-birimizə uzatdığımız əllərdə yaşayır.

Bəli, fikir ayrılıqları ola bilər. Türkiyədə hər kəs Azərbaycanın bütün qərarları ilə razılaşmaya bilər, Azərbaycanda da Türkiyənin hər bir siyasi mövqeyi ilə eyni düşüncədə olmayanlar tapılar. Dövlətlər müstəqildir, hər birinin öz qanunları, maraqları və qərarları var. Qardaşlıq bir-birinin bütün qərarlarını sorğusuz qəbul etmək deyil, fikir ayrılıqlarını düşmənçiliyə çevirmədən həll etmək mədəniyyətidir.

Məhz buna görə də Azərbaycanı Türkiyədən, Türkiyəni Azərbaycandan uzaqlaşdırmaq istəyənlər hər iki xalqın həssaslığı ilə oynamağı dayandırmalıdırlar. Bir tərəfdə Azərbaycanı Türkiyəyə qarşı qızışdıranlar, digər tərəfdə Türkiyə cəmiyyətini Azərbaycana qarşı kökləyənlər eyni bulaqdan su içirlər. Belələrinin əlindən ortaq strateji maraqların zərər görməsinə xidmət etməkdən başqa bir şey gəlmir. 

Türkiyənin milliyyətçi kəsiminin lideri, MHP sədri Dövlət Baxçalı Türk dünyasının tarixi, mədəni və insani bağlarının möhkəmləndirilməsini dəfələrlə vurğulayıb. Türk dünyasının birliyi haqqında danışırıqsa, bu birliyin ən mühüm sütunlarından biri Azərbaycan-Türkiyə qardaşlığıdır. Bu sütunu zəiflətmək isə yalnız iki dövlətin münasibətlərinə deyil, bütövlükdə Türk dünyasının gələcəyinə zərbə vurmaq deməkdir.

Bir anlıq düşünün: ortaq tariximizdən, ortaq dilimizdən, ortaq ağrılarımızdan və birlikdə qazandığımız uğurlardan daha üstün nə ola bilər ki, bir neçə gündəlik mübahisə naminə bunları təhlükəyə ataq?

Nə Azərbaycan Türkiyəsiz öz tarixi bağlarından imtina edəcək, nə də Türkiyə ilə Azərbaycanı bir-birinə bağlayan mənəvi tellər bir neçə təxribatçı paylaşımın təsiri ilə qırılacaq. Ancaq bu bağları qorumaq üçün hər iki tərəfdə məsuliyyətli davranmaq, təxribatla həqiqəti ayırmaq, emosiyaya qapılmadan düşünmək lazımdır.

Unutmayaq ki, iki dövlətin münasibətlərindəki hər çatlaqdan sevinənlər var. Biz onların sevincinə səbəb olmamalıyıq!

Azərbaycan və Türkiyə iki ayrı dövlətdir, amma bir-birinə yad iki xalq deyil. Suverenliyimizə hörmət, qarşılıqlı etimad və strateji əməkdaşlıq bu qardaşlığın əsas şərtləridir.

Bu gün hər iki tərəfdən sağlam düşüncəli insanlara düşən vəzifə qarşılıqlı ittihamları artırmaq deyil, ortaq məxrəc tapmaqdır, həmin buqələmunlara qarşı sipər olmaqdır. Çünki tarix bizə bir-birimizə qarşı üstünlük nümayiş etdirməyi deyil, çətin günlərdə bir-birimizin yanında dayanmağı öyrədib.

Azərbaycan-Türkiyə qardaşlığı gündəlik siyasi mübahisələrdən böyükdür!

İki dövlət, bir millət! 

Qardaşlığa hörmət, suverenliyə ehtiram, 

Türk dünyasına birlik!

Qəhr olsun Türk düşmənləri!

Arzuman Abdulkərimov

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ