Yeni doğulan körpənin üzündə ağ nöqtələr və səpkilər niyə yaranır? – Pediatrdən  AÇIQLAMA

Yeni doğulan körpələrin üzündə və bədəninin müxtəlif nahiyələrində xırda səpkilərin, qırmızı nöqtələrin və ya ağ rəngli kiçik qabarcıqların yaranması valideynləri çox vaxt narahat edir. Xüsusilə ilk dəfə valideyn olanlar körpənin dərisində hər hansı dəyişiklik gördükdə bunu xəstəlik əlaməti kimi qəbul edə bilərlər. Halbuki yeni doğulmuşlarda bəzi dəri səpkiləri kifayət qədər yayğındır və xüsusi müalicə tələb etmədən öz-özünə keçə bilir.

Pediatr Nihad Abdullayev Citypost.az-a açıqlamasında bildirib ki, yeni doğulan körpənin üzündə yaranan bəzi səpkilər fizioloji xüsusiyyət daşıya bilər və valideynlərin ilk növbədə panikaya düşməməsi vacibdir. Onun sözlərinə görə, xüsusilə toksik eritema kimi tanınan səpkilər yenidoğulmuş dövründə tez-tez müşahidə olunur və əksər hallarda ciddi təhlükə yaratmır.

“Yeni doğulmuş körpənin üzündə səpkilər və xırda-xırda ağ nöqtələr görən valideynlər çox vaxt narahat olurlar. Bunlar körpələrdə tez-tez rast gəlinən toksik eritema və ya milia adlandırılan dəri dəyişiklikləri ola bilər. Əksər hallarda qorxmağa ehtiyac yoxdur. Yenidoğulmuşlarda normal sayılan bu tip səpkilər müəyyən müddətdən sonra öz-özünə keçib gedə bilər. Əsas məsələ səpkilərin xüsusiyyətini düzgün qiymətləndirmək və valideynlərin özbaşına müalicəyə başlamamasıdır”, – deyə pediatr bildirib.

Mütəxəssis qeyd edib ki, milia xüsusilə yeni doğulan körpələrdə üz nahiyəsində, burun və yanaqlarda xırda, ağ rəngli nöqtələr şəklində görünə bilər. Bu vəziyyət tər vəzilərinin və ya dərinin səthi qatlarının xüsusiyyətləri ilə əlaqəli ola bilər və adətən xüsusi müdaxilə tələb etmir. Valideynlərin həmin nöqtələri sıxması, iynə ilə açmağa çalışması və ya müxtəlif kremlərdən istifadə etməsi isə düzgün deyil.

Toksik eritema isə yenidoğulmuşlarda rast gəlinən digər yayğın səpkilərdən biridir. Bu zaman dəridə qızartılı sahələr və onların üzərində xırda qabarcıqlar müşahidə oluna bilər. Səpkilər bir müddət sonra azalaraq tamamilə yox ola bilər. Lakin körpənin ümumi vəziyyətində dəyişiklik, yüksək hərarət, halsızlıq, qidalanmadan imtina və ya səpkilərin sürətlə yayılması müşahidə edilərsə, vəziyyət pediatr tərəfindən qiymətləndirilməlidir.

Nihad Abdullayev valideynlərin xüsusilə isilik məsələsinə diqqət etməli olduğunu vurğulayıb. Onun sözlərinə görə, körpələrin həddindən artıq geyindirilməsi və tərlədilməsi dəridə səpkilərin yaranmasına və mövcud qıcıqlanmanın daha da artmasına səbəb ola bilər.

“Burada əsas diqqət etməli olduğumuz məsələlərdən biri də isilikdir. İsilik çox vaxt körpənin həddindən artıq geyindirilməsi, isti mühitdə saxlanılması və çox tərlədilməsi nəticəsində yaranır. Valideynlər bəzən körpənin üşüməsindən qorxaraq onu qat-qat geyindirirlər. Nəticədə körpənin bədən temperaturu yüksəlir, tərləmə artır və dəridə xırda səpkilər əmələ gəlir”, – deyə pediatr bildirib.

Mütəxəssis əlavə edib ki, xüsusilə isti havalarda körpəni həddindən artıq bürümək lazım deyil. Yenidoğulmuşların istilik tənzimləmə sistemi böyüklərdən fərqli olsa da, bu, körpənin mütləq çox qalın geyindirilməli olduğu anlamına gəlmir. Əksinə, körpənin rahatlığı, otağın temperaturu, geyimin materialı və tərləyib-tərləməməsi nəzərə alınmalıdır.

“Analara həmişə bunu deyirik: körpəni öz geyindiyinizdən sadəcə bir qat artıq geyindirmək kifayətdir. Daha çox qat əlavə etmək, körpəni bürümək və tərlətmək düzgün deyil. Körpənin boyun və kürək nahiyəsini yoxlamaqla onun çox isti olub-olmadığını müəyyən etmək mümkündür. Əgər körpə tərləyirsə, dərisi həddindən artıq istidirsə, geyim qatlarının azaldılması lazım gələ bilər”, – deyə Nihad Abdullayev qeyd edib.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Pediatrın sözlərinə görə, isilik zamanı dəridə xırda qırmızı və ya çəhrayı səpkilər, bəzən isə kiçik qabarcıqlar meydana çıxa bilər. Bu səpkilər xüsusilə boyun, kürək, sinə, qoltuqaltı və digər dəri qatlarında daha çox görünə bilər. Dərinin daim nəm qalması və sürtünmə qıcıqlanmanı artıra bilər.

“Bəzən valideynlər səpkiləri gördükdə dərhal müxtəlif kremlər, məlhəmlər və hətta dərmanlar istifadə etməyə başlayırlar. Bu, hər zaman doğru deyil. Körpənin dərisinə səbəbi bilinməyən səpkilərə görə özbaşına dərman və ya güclü kosmetik vasitələr tətbiq etmək olmaz. Əvvəlcə bunun hansı səpki olduğunu müəyyənləşdirmək lazımdır”, – deyə pediatr vurğulayıb.

Mütəxəssis bildirir ki, körpənin dərisinə qulluq zamanı əsas məqsəd dərini təmiz və quru saxlamaq, həddindən artıq istilikdən qorumaq və dərinin hava almasına imkan verməkdir. Valideynlər körpənin paltarlarını seçərkən də yumşaq və hava keçirən materiallara üstünlük verməlidirlər.

Bununla yanaşı, hər səpkini “isilik” hesab etmək də düzgün deyil. Çünki yenidoğulmuşlarda müxtəlif səbəblərdən dəri dəyişiklikləri yarana bilər. Bəzi səpkilər tamamilə zərərsiz olsa da, infeksiya və digər xəstəliklərlə əlaqəli səpkilər də mümkündür. Buna görə səpkinin görünüşü ilə yanaşı, körpənin ümumi vəziyyəti də qiymətləndirilməlidir.

Nihad Abdullayev xüsusilə valideynləri körpənin dərisindəki dəyişikliklərlə yanaşı, onun davranışına və qidalanmasına da diqqət yetirməyə çağırıb. Körpə yaxşı qidalanırsa, aktivdirsə, hərarəti yoxdursa və ümumi vəziyyəti normaldırsa, bəzi yüngül yenidoğulmuş səpkilər ciddi problem olmaya bilər. Əksinə, körpədə hərarət, süstlük, nəfəs almaqda çətinlik, qidalanmadan imtina, səpkilərin sürətlə yayılması, irinləmə və ya dəridə qabarcıqların artması kimi əlamətlər varsa, pediatr müayinəsi gecikdirilməməlidir.

“Əgər körpəni xəstələndirmək istəmirsinizsə, onu həddindən artıq geyindirməkdən və tərlətməkdən uzaq durun. Valideynlər çox vaxt ‘uşaq üşüyər’ qorxusu ilə körpəni həddindən artıq bürüyürlər. Halbuki körpənin tərləməsi də arzuolunan vəziyyət deyil. Əsas məqsəd körpənin rahat temperatur şəraitində saxlanılmasıdır”, – deyə pediatr əlavə edib.

Həkim sonda bildirib ki, yeni doğulmuş körpənin dərisində səpkilərin meydana gəlməsi hər zaman xəstəlik demək deyil. Milia və toksik eritema kimi bəzi vəziyyətlər fizioloji xarakter daşıya və zamanla müalicəsiz keçə bilər. Lakin valideynlər səpkini sıxmamalı, iynə ilə açmamalı, özbaşına antibiotik, hormon tərkibli məlhəm və digər dərmanlardan istifadə etməməlidirlər. Körpənin vəziyyətində hər hansı şübhəli dəyişiklik olduqda isə ən doğru addım pediatrla məsləhətləşməkdir. Körpənin həddindən artıq geyindirilməməsi, tərləməsinin qarşısının alınması və dərisinə düzgün qulluq edilməsi isə bir çox sadə dəri problemlərinin yaranmasının qarşısını almağa kömək edə bilər.