Rəşad Məcid Xalq artistinə cavab verdi: Bunlar cılız intriqalardır 

"Təəssüf edirəm ki, Akademik Milli Dram Teatrında aktyorlar və teatr rəhbərliyi arasında münasibətlər yaradıcılıq müstəvisindən çıxıb, ictimaiyyətin də arzulamadığı cılız intriqalara yönəlir. Belə xırda intriqaların mətbuata çıxarılması isə ilk növbədə ehtiram bəslədiyimiz sənət adamlarının nüfuzuna xələl gətirir".

CityPost.az  xəbər verir ki, bu fikirlər Mətbuat Şurasının sədri Rəşad Məcidin Akademik Milli Dram Teatrının aktyoru, Xalq artisti Əli Nura cavab məktubunda yer alıb.

Məktubda bildirilib ki, Mətbuat Şurasının hansısa media subyektinin, yaxud jurnalistin yaradıcılıq azadlığını məhdudlaşdırmaq kimi səlahiyyəti yoxdur.

"İkincisi, mən özüm də bir il Akademik Milli Dram Teatrının Bədii Şurasının üzvü olmuşam. Teatrın aktyorları ilə gözəl təmaslarım, hər birinə dərin hörmətim var. Sənət adamları mənim üçün böyük dəyərdir. Bu dəyər tərəfkeşlik kimi primitiv saydığım əmələ qurban verilə bilməz.

Şəxsi mövqeyimə gəldikdə, mən sənət cameəsindəki intriqaların ictimai müzakirələr müstəvisinə çıxmasının tərəfdarı deyiləm. Fikrimcə, cəmiyyətə örnək şəxslərin adları yalnız onların yaradıcılıqları müstəvisində gündəmə gəlməlidir. Akademik Milli Dram Teatrı kollektivinin üzvləri də bu kateqoriyadan olan şəxslərdirlər. Arzu edərdim ki, onlar teatrın daxili problemlərinə, qəlizləşən münasibətlərə teatrın özündə müzakirələrlə aydınlıq gətirsinlər, çıxış yolları tapsınlar. Belə yanaşma daha optimaldır, ziyalı ampluasına xas davranışdır, ən əsası daha etikdir".

R.Məcid bildirib ki, Mətbuat Şurasının fəaliyyət prinsiplərində əsas olan medianın, habelə cəmiyyətin maraq və mənafelərinin qorunmasıdır.

"Biz daim buna əməl etməyə çalışırıq. Sonda bir daha kin və qəzəbin səmimi münasibətləri üstələməyəcəyinə böyük ümidimi, sənət adamlarımızın təmkininə inam və ehtiramımı bildirirəm",- Şuranın sədri qeyd edib.

Həmçinin oxuyun

"İsraili acı aqibət gözləyir" - Xamenei

İsrailin zərbələri nəticəsində İranın Baş Qərargah rəisi və “SEPAH”ın komandanı ölüb

İran İsrailə 100-dən çox PUA buraxıb 

Xırdalanda evlər yanır 

Qeyd edək ki, Xalq artisti Əli Nur Rəşad Məcidə ünvanladığı məktubunda teatrda son zamanlar baş verənləri ətraflı yazaraq, ona suallar ünvanlayıb.

"Uzun müddətdir ki, mən və digər həmkarlarım Akademik Milli Dram Teatrının bədii rəhbəri Mehriban Ələkbərzadənin fəaliyyəti ilə bağlı baş verən hadisələr barədə mətbuata açıqlamalar veririk. Əvvəllər bu açıqlamalarımız bütün xəbər saytlarında yayımlanırdı. Lakin Fizuli Hüseynovla yaşadığım insidentlə bağlı verdiyim son açıqlamada bildirdim ki, baş verənlər Mehriban Ələkbərzadənin təhriki ilə olub. Maraqlıdır ki, bu dəfə saytlar həmin açıqlamanı yayımlayarkən onun adını xüsusi olaraq çıxarıblar.

Azərbaycan Mətbuat Şurasının sədri kimi sizə açıq suallar ünvanlayıram:

1. Nəyə görə Mehriban Ələkbərzadə mətbuat tərəfindən qorunur?

2. Onun özbaşınalıqlarının ört-basdır edilməsi ilə bağlı mətbuata göstərişi kim verib?

3. Mehriban Ələkbərzadə ilə olan dostluq münasibətiniz, cənab Prezident tərəfindən sizə etibar edilən vəzifənin məsuliyyətini obyektiv şəkildə daşımağınıza mane olurmu?

Əgər bu suallara şəxsən sizin tərəfinizdən cavab verilməz və ictimaiyyətə aydınlıq gətirilməzsə, söz azadlığımıza qoyulan məhdudiyyətlərin birbaşa sizin nəzarətiniz və müdaxilənizlə həyata keçirildiyini düşünmək üçün ciddi əsaslarımız olacaq", - məktubda bildirilib.