32 nəfəri ölümə məhkum edən hakim öldü   

Bakı Ağır Cinayətlər Məhkəməsinin keçmiş hakimi Ənvər  Seyidovun  ölməsinə dair sosial şəbəkələrdə müxtəlif səpkili geniş yazılar yer almaqdadır.

Sabiq hakim uzunsürən xəstəlikdən sonra 76 yaşında dünyasını dəyişib.

CityPost.az  Ənvər Seyidov haqda maraqlı məlumatlar əldə edib.

Ənvər Seyidov 1949-cu il martın 29-da Oğuz rayonunda anadan olub.Azərbaycan Dövlət Universitetinin hüquq fakültəsində təhsil alıb.

Əmək fəaliyyətinə 1964-cü ildən başlayan hüquqşünas səhiyyə və rabitə sahəsində müxtəlif işlərdə çalışdıqdan sonra, 1972-ci ildə Azərbaycan Ədliyyə Nazirliyi sistemində işə başlamaqla respublika  VVAQ Arxivinin müdiri, Notariat və VVAQ İdarəsinin baş məsləhətçisi, Zaqatala və Cəlilabad rayon məhkəmələrinin hakimi, Cəlilabad Rayon Məhkəməsinin sədri vəzifəsində işləmişdir. 1990-cı ildən Azərbaycan Respublikası Ali Məhkəməsinin, 2000-ci ildən Ağır Cinayətlərə dair Azərbaycan Respublikası Məhkəməsinin, 2011-ci ildən 2019-cu ilədək Bakı Ağır Cinayətlər Məhkəməsinin hakimi vəzifələrində işləmişdir. Hərbi polkovnikdir

1994–99-cu illərdə Azərbaycan Respublikası Mərkəzi Seçki Komisiyasının üzvü, təftiş qrupunun rəhbəri olmuşdur. O, fəaliyyəti dövründə bir sıra səs-küylü cinayət işlərini araşdırması ilə tanınıb. Onun sədrliyi ilə keçmiş müdafiə naziri Rəhim Qazıyev barəsində əvvəlcə qiyabi ölüm hökmü çıxarılıb. Sonradan hökm dəyişdirilərək Qazıyev ömürlük azadlıqdan məhrum edilib. Həmin hadisədən sonra onlar arasında münasibətlər kəskinləşib, Rəhim Qazıyev Ənvər Seyidovu açıq debatlara çağırıb.Azərbaycan Milli Hərəkatının öncüllərindən olan,tanınmış şair Xəlil Rza Ulutürkün uzunmüddətli həbsinə dair hökm çıxarsa da, sonradan onun çıxardığı hökm Azərbaycan Respublikası Baş Prokurorluğunun verdiyi protest əsasında dəyişdirilmiş və ona bəraət verilmişdir. 

Ənvər Seyidovun baxdığı işlər arasında ləğv edilmiş Milli Təhlükəsizlik Nazirliyinin (MTN) əməkdaşları tərəfindən həbs edilən Səid Rüstəmbəylinin, eləcə də bir neçə NİDA fəalının cinayət işləri də yer alır.

Elə həmin ərəfələrdə Ənvər Seyidov bir neçə MTN-çinin mükafatlandırılması üçün keçmiş nazir Eldar Mahmudova məktub yazmışdı. Həmin məktub da geniş müzakirə mövzusuna çevrilmişdi. Məşhur sabiq hakim sonuncu dəfə təqaüdə çıxdıqdan sonra pensiyasının düzgün hesablanmaması ilə bağlı Dövlət Sosial Müdafiə Fondunu məhkəməyə verməsi ilə gündəmə gəlmişdi.

Həmçinin oxuyun

Sevinc Həmidovanın şikayəti qeyri-mümkün sayıldı   

Səssiz vasitəçi: Tramp və Putin arasında Netanyahu

ABŞ İsrailin Fələstin ərazisi üzərindəki hüquqlarını tanıyıb

Nəsimi rayonunda 11 kiloqram narkotik vasitə dövriyyədən çıxarılıb - VİDEO 

Adının açıqlanmasını istəməyən mənbənin verdiyi məlumata görə,Ənvər Seyidov 32 nəfər barədə ölüm hökmü çıxarması ilə fəxr edirmiş.Onun bədii “yaradıcılıqla” məşğul olduğu da deyilir.Ənvər Seyidov hansısa  yollarla Azərbaycan Yazıçılar Birliyinin yüksək qatlarına yol tapmış və AYB-nin üzvü olmuş,hətta bir sıra ədəbi mükafatlara “layiq görülmüşdür.”

Digər bir mənbədən aldığımız məlumata görə,Ənvər  Seyidovun müəllifliyi ilə dərc olunan kitablar başqa şəxslər tərəfindən maddi maraq qarşılığında ərsəyə gəlib.Həmin kitabların əsl müəlliflərinin kimliyi də çoxlarına bəllidir.Həmin şəxslərin yazdığı əsərlər Hüseybala Mirələmov  və Tağı Əhmədovun müəllifliyi ilə də nəşr edilib.

Ənvər Seyidovun iki övladı var. Onlardan biri – Fərrux Seyidov Konsitutsiya Məhkəməsi sədrinin müşaviri,digəri isə Bakı Dövlət Universitetində çalışır.

Ənvər Seyidovun Nərimanov metrosu ətrafında bir neçə ticarət obyekti var və onlar hazırda icarəyə verilib.

Ənvər Seyidov keçmiş daxili işlər naziri İsgəndər Həmidovla dolayısı yolla bacanaq olub.Onun Ağdaşın keçmiş icra başçısı Tofiq İbrahimovla da  yaxın qohumluq əlaqəsi  mövcuddur.

Müşərrəfxanım