Mirələm tamamilə manıslaşdı

Adam var, başı var, amma oxumur. Adam da var, səsi var, amma artıq oxumaq istəmir. 

Mənə elə gəlir ki, Mirələm Mirələmov artıq səsi yox, başı ilə oxumağa çalışır. 

Çalışır ki, heç olmasa, səsi öz başına düşməsin.

Ümumiyyətlə, nədənsə, Azərbaycanda bir neçə sahə var ki, o sahənin adamları müəyyən uğur qazanandan sonra pis formada arxayınlaşır, seyid cəddinə arxayın olan kimi qazandıqlarına arxayın olub hər şeyin başını buraxırlar. 

Məsələn, idmançılarımız cəmi bir dəfə olimpiya çempionu olandan sonra az qala idmanla tamamilə vidalaşırlar. 

İndi Mirələm Mirələmovda da belə oldu. Oxudu, tanındı, sevildi, sonra da başladı qalxdığı zirvədən düşməyə. 

Məncə, Mirələm Mirələmovu söndürən məsələlərdən biri də toy oldu. 

Təkrar edirəm, məsələ toy oxumaq deyil, istənilən halda lap müğənni özünü diri saxlamaq üçün də toy oxumalıdır. 

Ancaq yox, əgər tamamilə pulun, toy bayağılığın arxasınca gedirsənsə, sənəti ikinci plana atırsansa, məsələ bitmiş elan olunur. 

Həm də elə bil, bizdə toylar bəzi müğənniləri oxutmağa yox, susdurmağa xidmət edir. 

Yəni ilk vaxtlar toy müğənnidən istifadə edir, sonra müğənni toydan istifadə edir, axırda isə hər ikisi bir-birini yola verir.

Obrazlı desəm, bu mənada, Mirələm Mirələmovun səsi əvvəlcə cırlaşdı, sonra da kallaşdı. 

Günün birində isə Mirələm tamamilə manıslaşdı. 

Əgər bir vaxtlar onun səsi sinədən gəlib, boğazından çıxırdısa, indi xirtdəyində qalıb. 

Ümumiyyətlə, Mirələm Mirələmov səsini yox, adını qorudu. Bu səbəbdir ki, artıq səsi də onu müdafiə etmir, danır. Səsi heç üzünə də durmur. Qayıdıb qalır içində. 

Məsələn, mən səs olsaydım, indiki məqamda Mirələmin boğazından çıxmazdım. Acığa ilişib qalardım ki, öskürsün, boğulsun. 

O Mirələm ki, əvvəllər oxuyanda mahnı onun səsinə uyğunlaşırdı. 

İndi isə Mirələm mahnının dalınca qaçır. Səsi boğazından çıxdımı, tez qaçıb gizlənir. O da qalır axtara-axtara. 

Bir də görürsən ki, Mirələm oxumayanda səsi daha yaxşı olur. 

Görünür, oxumasa, Mirələmovun səsi hələ də yaxşıdır.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ