"12 yaşıma qədər atamla bağlı əslində nə baş verdiyini dəqiq bilmirdim"

Firudin İbrahiminin oğlu Fərhad İbrahiminin atası ilə bağlı xatirələrini oxudum. Təsirlidir. Qeyd edim ki, Fərhad bəy hazırda Niderlandda yaşayır. Ailəlidir. Övladları, hətta nəvələri də var. 

 ...Mənə elə gəlir ki, atası Firudin İbrahimini Azərbaycanda tanımayan çox az adam var. O, Milli Hökumətin sabiq baş prokuroru, görkəmli ictimai xadim və jurnalist idi. Rza şah Pəhləvi tərəfindən 1947-ci ildə edam edilmişdi. Tarix yazır ki, o, asılacağı ipi öpərək belə söyləmişdi: 

     Sən çağırsan gələrəm mən,

     Eybi yoxdur ölərəm mən,

     Təki sən yaşa, Azərbaycan! 

  Fərhad İbrahimi öz xatirələrini belə dilə gətirib: "12 yaşıma qədər atamla bağlı əslində nə baş verdiyini dəqiq bilmirdim. Deyəsən, o dövrdə böyüklər hesab edirdilər ki, uşaqlara kədərli hadisələrdən danışmaq olmaz – bəlkə də mənim siyasi məsələlərə məruz qalmamağımı istəyirdilər. Atamın harada olduğunu soruşduğumda ilk cavab bu oldu: “Uzunmüddətli xarici səfərdədir, nə vaxt qayıdacağı bilinmir.” Bir müddət sonra dedilər ki, avtomobil qəzası keçirib və xəstəxanadadır. Nəhayət, təxminən 10 yaşım olanda mənə onun dünyasını dəyişdiyini bildirdilər.

   Bir yay günü ögey atamın iş otağında nağıl kitabı axtararkən “Azərbaycan Demokrat Firqəsi” adlı bir kitab diqqətimi çəkdi. Vərəqləyərkən bir səhifədə cərgə ilə düzülmüş bir qrup kişinin şəklinə rast gəldim. Aşağıda adlar yazılmışdı. Birdən bir ad gözümə dəydi: Firudin İbrahimi!

Mətni dəfələrlə oxuduqdan sonra nə baş verdiyini anladım.    

   Ağlaya-ağlaya, qışqıraraq pilləkənlərdən aşağı düşdüm. Anam məni bu halda görəndə nə baş verdiyini anlamadı. Onunla danışmaq istəmirdim. Ağlamağım axşama, ögey atam evə qayıdana qədər davam etdi. O, məni ağlayan görəndə nə baş verdiyini soruşdu. Nəhayət, ona nəyi öyrəndiyimi danışdım. O isə mənə atam haqqında danışmağa başladı – insanlığa, azadlığa və ədalətə olan sevgisindən, siyasi və ideoloji baxışlarına necə sadiq olduğundan bəhs etdi.

   Bu, məni müəyyən qədər sakitləşdirdi. Lakin içimdə atama qarşı bir inciklik yarandı: o, öz siyasi inanclarını mənim varlığımdan üstün tutmuşdu.

   Ögey atamın söylədiklərini anlamağım bir qədər zaman aldı. Amma daha çox insanın atam haqqında yüksək fikirlər söylədiyini eşitdikcə həqiqəti qəbul etməyə başladım. Bu insanlar arasında məktəbdəki bir neçə müəllimim də var idi. Onlar solçu siyasi baxışlara malik idilər və ölkədəki polis rejiminə görə bunu açıq şəkildə ifadə edə bilmirdilər.

   Atamın kim olduğunu öyrəndikdən sonra mənə xüsusi diqqət və dəstək göstərir, fürsət düşdükcə ona olan hörmətlərini bildirirdilər..."

Məcid Rəşadətoğlu

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ