Professor Əyyub Əzizovun anadan olduğu gündür

Bu gün BDU kollektivinin sevimlisi, el ağsaqqalı, Respublikanın əməkdar müəllimi, Bakı Dövlət Universitetinin Kimyanın tədrisi metodikası kafedrasının müdiri (1987-2021),  professor Əyyub Əzizovun anadan olduğu gündür. 

 Əyyub Teymur oğlu Əzizov 1934-cü il avqustun 12-də Qərbi Azərbaycanın Zəngibasar rayonu (Üçkilsə) Şöllü Mehmandar kəndində dünyaya gəlmişdir. Yeddinci sinfə qədər doğulduğu kənddə oxuyan Əyyub Əzizov 1948-ci ildə ailəsi ilə birlikdə doğma yurdunu tərk etməyə məcbur olmuş, əvvəlcə Naxçıvana, oradan Beyləqan rayonunun Daşburun kəndinə, sonra isə Ağcabədi rayonuna gəlmiş, təhsilini əvvəlcə Ağcabədi rayonunun 3 saylı, sonra isə Xəlfərəddin kənd orta məktəbində davam etdirmişir. Orta təhsilini başa vurub Azərbaycan Dövlət Pedaqoji Universitetinin təbiət və kimya fakültəsinə qəbul olunur. 1957-ci ildə həmin fakültəni müvəffəqiyyətlə bitirərək orta təhsil aldığı Xəlfərəddin kənd orta məktəbində (hazırda 2 saylı tam orta məktəb) müəllimlik fəaliyyətinə başlayır və 5 ilə yaxın burada kimya fənnindən dərs deyir.

1961-ci ildə AMEA-nın Kimya İnstitutunun aspiranturasına daxil olan Əyyub Əzizov 1967-ci ildə namizədlik dissertasiyası müdafiə edir. Bir alim kimi 1969-cu ildən həyat yolunu Bakı Dövlət Universiteti (BDU) ilə bağlayan Əyyub müəllim 1987-ci ildən Kimyanın tədrisi metodikası kafedrasına rəhbərlik etmişdir. Özünə və başqalarına qarşı son dərəcə tələbkar və humanist olan professor Ə.Əzizovun respublilkamızda, eləcə də əcnəbi ölkələrdə 200-dən artıq elmi, metodiki məqalələri çap olunmuşdur. Həmçinin professor iki dərsliyin, iki dərs vəsaitinin müəllifidir. Eyni zamanda, o, BDU-nun və kimya fakültəsinin elmi şurasının üzvü olmuşdur.

Yalnız dərs deməklə kifayətlənməyən professor Ə.Əzizov həm də kimya elminin aktual problemlərinə dair bir çox sanballı elmi əsərlərin müəllifidir: "Kimyanın tədrisi metodikası", "Kimyadan pedaqoji praktikanın təşkili və keçirilməsi", "Kimyanın öyrədilməsində sinifdənkənar və müstəqil işlər" və sair. Onun eyni zamanda müştərək yazdığı "Kimya tədrisinin müasir problemləri", "Kimyəvi maddələrin təsirindən ətraf mühitin çirklənməsi və onunla mübarizəni şagirdlərə öyrədilməsi" əsərləri bu gün də aktualdır. Əyyub müəllim nəzəriyyə ilə təcrübəni bir-birilə üzvi surətdə əlaqələndirir, tədqiqatlarını bu istiqamətdə aparırdı. Onun yazdığı "Qeyri-üzvi kimyanın tədrisinə aid praktikum", "Kimyanın tarixinə dair materiallar", "Kimyanın tədrisində görkəmli alimlərin həyat və yaradıcılığına dair materialların öyrədilməsi", "Kimya təliminin prinsipləri, üsulları, priomları", "Kimya tədrisi metodikası" I hissə, "Kimyanın tədrisi metodikası" II hissə, "Kimya tədrisi üsulu və praktikumu" və sair kitablar da deyilənlərin əyani təsdiqidir.

Professor Əyyub Əzizov bir insan kimi yüksək mənəvi keyfiyyətləri ilə nəinki qohumlarının, dost-tanışlarının, habelə onu tanıyan bütün insanların səmimi sevgisini qazanıb. İndi Əyyub müəllim ömrünün müdrik çağlarını yaşayır. Arzu edirik ki, hörmətli alimimizin həyatının sonrakı illəri də daim firavan, sağlam və səadət ilə dolu keçsin.

Nəcib və xeyirxah insan, ağsaqqal hacı, sinəsi sözlə dolu, abırlı və ləyaqətli insan olan Əyyub müəllimi ad günü münasibətilə təbrik edir, Köhnə kişilərin nadir nüməyəndələrindən birinə cansağlığı arzulayırıq.

Müəllif: Fikrət Şiriyev

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ