Yadigar Məmmədli- 65  

Eh, bu dünya əzəldən yaxşı adamlarla yola getmir. Başlarına elə oyunlar açır ki, bir də baxıb görürlər ki, ömrün çoxu gedib, azı qalıb. İndi gəl, o azın içində yaşa da. Ay yaşadın ay, ürəyini qoruyursan, böyrəyin sözünə baxmır. Ciyərini gözləyirsən, mədə-bağırsağın başına oyun açır. Və bir də görürsən ki, gecdir, gecdir daha, geriyə yol yoxdur. Nüsrət Kəsəmənli demişkən: 

“Olan olub, keçən keçib bəlkə də, 

İndi daha kövrəlməyin yeri yox...”

Soytxamıram, deyinirəm ki, fələyin gözü çıxmasın, dünən Azadlıq meydanında plaşının yaxalığını qulaqlarına kimi qaldırıb sovet hökumətinə qarşı üsyan edən Yadigar Məmmədlinin 65 yaşı nə tez gəlib çatdı...

Deyir ki:- "Mən jurnalist kimi fəaliyyətə başladığım illərdə meydan hərəkatı var idi. Bu yolda hər kəs öz qabiliyyətini ortaya qoymağa çalışırdı. Vətən sevgisi, milli kimlik, müstəqillik məsələləri çox önəmli idi. Həmin dövdrə bəzi insanlar öz peşəsindən uzaqlaşıb siyasətçi oldular. Zorən siyasətçi. Çox şükür ki, mən siyasətçi kimi yox, öz peşəmlə tanındım, jurnalist kimi fəaliyyətimi davam etdirdim. Nə etdimsə, jurnalist kimi etdim. Cəmiyyətdəki mövqeyimi, insanların mənə qarşı müsbət fikirlərini məhz jurnalist kimi qazanmışam. Düşünürəm ki, bəlkə başqa sahədə olsaydım, bu qədər tanınmazdım. Jurnalistika mənə çox şey verdi. Təbii ki, mən də jurnalistikada müəyyən işlər görməyə çalışdım, bunun üçün mücadilə apardım. Ortada görülən işlər var. Düzdü fəaliyyət göstərdiyim jurnalistika sahəsində də bir çox problemlərlə, çətinliklərlə qarşılaşmışam. Həbs olunmuşam. Amma heç zaman usanmamışam, məqsədimdən, düz yolumdan dönməmişəm. Jurnalist kimi fəaliyyətimi davam etdirmişəm, gördüyüm işlər və nailiyyətlərimlə fəxr edirəm..."

Jurnalist işlədiyi müddətdə başına maraqlı hadisələr çox gəlib. 90-cı illərdə həbsdən yenicə azad olunanda, bir gün işlədiyi redaksiyada ona deyirlər ki, səni İngiltərə səfirliyinə vacib bir iş üçün çağırırlar. Əvvəlcə elə düşünüb ki, onunla zarafat edirlər. Növbəti dəfə zəng gələndən, səfirliyin nümayəndəsi ilə danışandan sonra inanıb ki, həqiqətən də onu İspaniyanın ölkəmizdəki səfiri iqamətgahına dəvət edir. O vaxt İspaniya ilə diplomatik əlaqələrimiz İngiltərə səfirliyi vasitəsilə həyata keçirilirdi. Səfir bildirib ki, İspaniya vətəndaşı olan bir azərbaycanlı ona məktub yazıb. Soyadı Yadigarovdur. Məktubda yazılmışdı: "Bəlkə də biz qohumuq. Mən sənin həbs olunmağından çox pis olmuşam. Səni İspaniyaya dəvət edirəm". O da birtəhər səfiri başa salıb ki, soyadı yox, adı Yadigardır...

“Mən öz missiyamı həyata keçirmək üçün uzun bir yol keçmişəm. Bundan sonra qarşıya qoyduğum hədəflərim bu günədək gəldiyim yolun davamıdır. Yarımçıq qalan işlərimi tamamlamaq istəyirəm. Jurnalistika sahəsi ilə bağlı arzularım çoxdur. İstəyirəm ki, ölkədə aparılan köklü islahatlar kimi, media sahəsində mövcud olan problemlər də tədricən həllini tapsın, aradan qalxsın. Jurnalistikadakı peşəkar insanlara geniş imkanlar yaradılsın."- söyləyir...

Sevincli günlərilə yanaşı dərdli, qəmli, günləri də az olmayıb. Fəqət, heç zaman sınmayıb, müvazinətini itirməyib. Əksinə, taleyi ona müqavimət göstərdikcə bərkiyib, polad kimi sərt olub. Sadə, təvazökar, zəhmətkeş insandır. Aydın, işıqlı keçmişi var. Davranışında təbiidir. Necə deyərlər, sevinəndə də, kədərlənəndə də ürəkdən sevinib, ürəkdən kədərlənir. Axı, saflığını hələ də qoruyub saxlaya bilir...

Deyir ki:- “Mən atamı erkən gəncliyimdən itirmişəm. O, 56 yaşında dünyasını dəyişib. Mən o zaman elə fikriləşirdim ki, atam qocalıqdan rəhmətə gedib. Görüntüsü elə idi. Amma indi özüm ondan daha yaşlıyam və baxıb görürəm ki, o, çox erkən dünyasını dəyişib. Axı 56 yaş nə yaşdır ki? Mən isə hələlik atamdan düz doqquz ildir ki, çox yaşayıram. Narahat, amma mənalı ömür yaşamışam. Təskinliyim də ondadır ki, bu həyatı mən özüm seçmişəm, buna düçar olmamışam..."

...Xalq şairi, unudulmaz Məmməd Araz deyirdi ki:

“Dünyada nə qədər yaxşı adam var,

Yaxşılıq insanla əkiz doğulur.

Ən yaxşı adamlar, yaxşı adamlar,

Nədənsə, dünyada oxşarsız olur.”

Bəli, bizim Yadigar Məmmədli də bu cür yaxşı adamdır. 65 yaşı mübarək olsun!

Hörmətlə, Elman Eldaroğlu

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ