Ramidə Yaqubqızı: “Şəfiqə Məmmədova Azərbaycan qadınının əzəmətini yaşadıb”

Azərbaycan Kinematoqrafçılar İttifaqının yeni sədri seçilib. Bu, hamımızın tanıdığı, müxtəlif səpkili rollar yaradıcısı Xalq artisti Şəfiqə Məmmədovadır. İlk olaraq tamaşaçı, vətəndaş kimi işində uğurlar arzulayıram. İnanıram ki, son nəfəsini yaşayan, son işartılarda közərən Azərbaycan kinosu özünün yeni inkişaf mərhələsinə qovuşacaq. Yaxın keçmişdə olduğu kimi keyfiyyətli, milli dəyərlərə söykənən, adət-ənənələrimizi, kimliyimizi əks etdirən filmlər araya-ərsəyə gələcək, ekran əsərləri yaranacaq. Peşəkarlar iş başında olanda ümidlər də işıqlı sonluqla nəticələnir. İnşəallah kino tariximizdə yeni bir səhifə açılmaqla yanaşı, yeni uğurlara da imza atılacaq. Bütün bunlar öz yerində. Və yeni təyinatın vəzifə borcları kimi dəyərləndirib, qiymətləndirirəm. 

Amma Şəfiqə Məmmədova mənim uşaq yaddaşımdan ta bu günə kimi əzəmətli Azərbaycan qadını obrazında qalıb. Nədənsə, söhbət açacağım filmdəki rolunu qadınlarımızın qürurunun, əyilməzliyinin təcəssümü kimi bilmişəm. Elə o vaxtdan da bu aktrisa yaddaşımda "Qaraca qız" filmində yaratdığı Pəricahan xanım kimi qalıb. Bu onun kinoda ilk obrazı olsa da, kifayət qədər uğurlu alınıb. Xatırlayırsınızsa əgər, filmin sonlarına yaxın, bəyin evində qonaqlıq təşkil edilir. Həmin məclisdə Qaraca qızın qaraçı rəqsi öyrətdiyi Ağca ilə bərabər rəqs etdiyi məqamda xanım içəri daxil olur. Doğrudur, burada o, biraz hikkəli obrazda olsa da, duruşunda, yerişində bir qadın qüruru, əzəməti var. Mənə elə gəlir ki, həmin baxışlarda azərbaycanlı xanımlarının mübarizlik görkəmi yaşayır. 

Şəfiqə Məmmədova xarakterik və çoxqütblü aktrisadır. Bir-birinə bənzəməyən obrazları hərəsi ayrıca bir aləmdir. Məsələn, "Dədə Qorqud" dakı Burla Xatun da Azərbaycan xanımının ləyaqət, mərdlik və mübarizlik göstəricisidir. Yaxud da, "Bizim Cəbiş müəllim" filmindəki Cəbiş müəllimin həyat yoldaşı. "Pəncəyimiz yoxdur, amma, yağımız, çörəyimiz var" deyimi bir ananın övladları üçün hər əziyyətə qatlaşmasına misaldır. "Allah səni də öldürsün, Hitleri də" desə də, həyat yoldaşına dayaq olmaqla öz sədaqətini nümayiş etdirir. 

"İstintaq" filmindəki Gülya obrazı isə yenə də ailəsi, uşaqları üçün hər əziyyətə qatlaşan, biraz şıltaq, biraz kövrək, biraz da dəli-dolu Azərbaycan qadınıdır. 

Onun yaratdığı daha bir fərqli obraz isə, "Ad günü" filmindəki Fəridə roludur. Nə qədər sərt olsa da, bir o qədər də ürəyi yumşaq, mərd xanımdır. Bütün bunlar Şəfiqə Məmmədova yaradıcılığının ayrılmaz, şöhrətli hissəsidir. 

Elə ona görə də zəhməti, əməyi dövlət tərəfindən "Şöhrət", "Şərəf", və "İstiqlal" ordenləri ilə qiymətləndirilib. 

Ramidə Yaqubqızı

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ