Taleh Qaraşov Vilvan sakinlərinin qayğı və problemlərini dinlədi

Vətəndaşları narahat edən problemlərin həllinə xüsusi diqqət göstərilməsi, dövlət-vətəndaş dialoqunun genişləndirilməsi və qarşılıqlı inamın daha da möhkəmləndirilməsi baxımından yerlərdə təşkil olunan səyyar görüşlər böyük əhəmiyyət daşıyır.

Citypost.az xəbər verir ki, Lənkəran Şəhər İcra Hakimiyyətinin (ŞİH) başçısı Taleh Qaraşovun Vilvan kəndinin sakniləri ilə növbəti görüşü də məhz bu məqsədlə reallaşdırılıb. Qəbulda şəhər İcra hakimiyyəti başçısı aparatının rəsmiləri, hüquq-mühafizə orqanlarının, yerli idarə və müəssisələrin nümayəndələri də iştirak ediblər. 

Lənkəran ŞİH başçısı Taleh Qaraşov çıxışında dövlət səviyyəsində həyata keçirilən strateji islahatlara toxunaraq bildirib ki, ölkəmizdə kənd təsərrüfatının inkişafı barədə qəbul olunan Dövlət Proqramı regionların, xüsusilə də Lənkəranın aqrar potensialının tam reallaşdırılması üçün yeni imkanlar açır. Bu proqram çərçivəsində rayonda ənənəvi təsərrüfat sahələrinin bərpası, məhsuldarlığın artırılması və kənd zəhmətkeşlərinin rifahının yüksəldilməsi istiqamətində məqsədyönlü addımlar atılır.

İcra başçısı istehsal olunan kənd təsərrüfatı məhsullarının itkisiz saxlanılması və ixrac potensialının artırılması üçün müasir soyuducu anbar komplekslərinin tikintisinin vacibliyini xüsusi vurğulayıb. Qeyd olunub ki, hazırda inzibati ərazi dairəsində kənd təsərrüfatı məhsullarının saxlanılması məqsədilə 2 soyuducu anbar fəaliyyət göstərir, yerli fermerlərin tələbatını daha dolğun qarşılamaq üçün isə bir yeni soyuducu anbarın tikintisi sürətlə davam etdirilir.

İcra başçısı qeyd edib ki, müasir dövrün çağırışlarına uyğun olaraq vətəndaş-məmur münasibətlərinin şəffaflaşdırılması və xidmətlərin əlçatanlığının təmin edilməsi məqsədilə "Rəqəmsal icra hakimiyyəti" yol xəritəsi uğurla icra olunmaqdadır. Bu rəqəmsal platforma sayəsində sakinlər icra hakimiyyətinə gəlmədən, öz müraciət və təkliflərini onlayn qaydada birbaşa ünvanlaya, yerli əhəmiyyətli məsələlərin həllində operativ iştirak edə bilərlər. Taleh Qaraşov vurğulayıb ki, rəqəmsal idarəetmənin tətbiqi kağız dövriyyəsini və vaxt itkisini azaldaraq, göstərilən xidmətlərin keyfiyyətini və operativliyini maksimum dərəcəyə çatdırır.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Sonda sakinlər tərəfindən qaldırılan fərdi və ümumi xarakterli müraciətlər qeydiyyata alınıb. İcra hakimiyyətinin başçısı qaldırılan problemlərin operativ şəkildə araşdırılması və qanunvericiliyə uyğun həlli üçün aidiyyəti qurumların rəhbərlərinə yerindəcə konkret tapşırıqlar verib.

Vilvan kənidinin sakinləri Lənkəranda aparılan genişmiqyaslı quruculuq işlərinin və icra olunan sosial layihələrin digər bölgələr üçün örnək olduğunu vurğulayıblar. Regionun hərtərəfli tərəqqisinə göstərilən bu yüksək diqqət və qayğıya görə cənab Prezident İlham Əliyevə və Birinci vitse-prezident Mehriban xanım Əliyevaya dərin minnətdarlıqlarını bildiriblər.

Qeyd edək ki, səyyar görüşdən sonra sakinlərə fərdi qaydada mygov və SİMA tətbiqlərindən istifadə qaydaları izah olunub.