Zülfiyyə Quliyeva: “Əxlaq insanın geyimində deyil, mənəviyyatındadır”

Jurnalist Zülfiyyə Quliyeva məktəblərdə hicabla bağlı müzakirələrə münasibət bildirib. O, paylaşımında məsələni hüquqi və pedaqoji baxımdan dəyərləndirərək şagirdlərin baş örtüyünə görə məktəbə buraxılmamasını qanunsuz hesab etdiyini bildirib.

Citypost.az xəbər verir ki, Jurnalistin sözlərinə görə, məktəbli forması ilə bağlı qaydalarda hicabın qadağan olunması barədə konkret müddəa yoxdur. O, baş örtüyü ilə bağlı məhdudiyyətlərin tətbiq edilməsini digər geyim nümunələri ilə müqayisə edərək məsələyə fərqli yanaşmanın düzgün olmadığını vurğulayıb.

“Əslində, məktəbli formaları ilə bağlı qaydada ‘hicab qadağandır’ ifadəsi yoxdur. Bu, bir baş örtüyüdür. Tutaq ki, bir uşaq hicab yox, papaq taxır. Məktəbdə ona ‘niyə papaq taxmısan?’ demək qanuna ziddir. Onda gəlin, papaq taxanları da məktəbə buraxmayaq”, – deyə Zülfiyyə Quliyeva qeyd edib.

O bildirib ki, məsələnin hüquqi tərəfini diqqətə çatdırmaqla yanaşı, məktəbli geyimi ilə bağlı qərarların pedaqoji şuralara həvalə edilməsinə də toxunub. Jurnalistin fikrincə, baş örtüyünə görə şagirdin məktəbə buraxılmaması hüquqi baxımdan əsaslandırılmalıdır.

Zülfiyyə Quliyeva uşaqların hicabın mahiyyətini dərk etmədən bu geyimi seçməsinin tərəfdarı olmadığını da vurğulayıb. Onun sözlərinə görə, bir çox uşaq hicabı valideynlərinin tövsiyəsi ilə taxır və bu məsələdə uşağın öz seçiminin nəzərə alınması vacibdir.

Bununla belə, jurnalist hicab taxan şagirdin dərslərini yaxşı oxuduğu halda baş örtüyünün tədris prosesinə hansı zərəri verə biləcəyini sual edib.

“Uşaqların hicabın mahiyyətini anlamamış taxmalarının tərəfdarı deyiləm. Etiraf edək ki, uşaqların çoxu hicabı valideyn tövsiyəsi ilə taxır. Bu da əslində uşağın hüququnun pozulmasıdır. Amma İslam o qədər gözəl dindir ki, insanı hər zaman düz yola çəkir. Hicab taxan şagird dərsini yaxşı oxuyursa, onun baş örtüyünün tədris prosesinə nə zərəri var ki? Mən belə düşünürəm”, – deyə o bildirib.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Jurnalist paylaşımında hicabın avtomatik olaraq əxlaq göstəricisi kimi təqdim edilməsinə də etiraz edib. O, insanın mənəvi keyfiyyətlərinin yalnız geyimi ilə müəyyənləşdirilməsinin yanlış olduğunu qeyd edib.

Zülfiyyə Quliyeva fikrini əsaslandırmaq üçün şəxsi tanışlığı ilə bağlı bir nümunə çəkərək, baş örtüyünün insanın davranışına və əxlaqına zəmanət vermədiyini iddia edib. Onun fikrincə, hicablı qadınların davranışlarına münasibətdə də stereotiplərdən uzaq durmaq lazımdır.

“Amma hicabı sırf əxlaq rəmzi kimi təqdim etməyin qəti tərəfdarı deyiləm. Sözüm ondadır ki, əxlaq insanın mənəviyyatındadır. Başın bağlı olması insanı əxlaqlı etmir!” – deyə jurnalist fikrini yekunlaşdırıb.