Britaniya Ukraynaya yeni hərbi dəstək elan etdi

Portsmutdakı Kral Hərbi Dəniz Qüvvələrinin bazasında Ukrayna Prezidenti Volodimir Zelenski ilə Böyük Britaniyanın yeni Baş naziri Endi Börnhem arasında ilk görüş keçirilib.

AZƏRTAC Ukrayna Prezidentinin rəsmi saytına istinadla xəbər verir ki, bu, Endi Börnhemin iyulun 20-də Baş nazir vəzifəsinin icrasına başlamasından sonra xarici ölkə liderinin Böyük Britaniyaya ilk səfəridir. Prezident və Baş nazir əvvəlcə təkbətək, daha sonra isə Kral Hərbi Dəniz Qüvvələrinə məxsus "HMS Queen Elizabeth" təyyarədaşıyan gəmisində nümayəndə heyətlərinin iştirakı ilə görüş keçiriblər.

“Mən sizi və bütün ukraynalıları əmin etmək istəyirəm ki, Ukraynaya dəstəyimiz dəyişməz olaraq qalır. Düşünürəm ki, Britaniya cəmiyyətinin böyük əksəriyyəti də bu mövqeyi bölüşür. Yaşadıqlarınızın nə qədər ədalətsiz olduğunu hiss edir və anlayırıq ki, sizin yanınızda olmaq, sizə dəstək vermək bizim borcumuzdur”, – deyə Endi Börnhem bildirib.

Baş nazir əlavə edib ki, Böyük Mançesterin meri olduğu dövrdə ukraynalı həmkarları ilə sıx əməkdaşlıq edib və Ukraynaya dəstək göstərilməsi istiqamətində müxtəlif təşəbbüslərdə iştirak edib.

“Məhz Britaniya cəmiyyətinin Ukraynaya dəstək məsələsində nümayiş etdirdiyi birlik son dərəcə vacibdir. Ukrayna şəhər rəhbərləri ilə geniş iş təcrübəniz, şübhəsiz ki, baş verənləri, bu müharibənin mahiyyətini və onun yaratdığı çətinliklərin miqyasını daha dərindən anlamağınıza imkan verir”, – deyə Zelenski vurğulayıb.

Liderlər gələcək tərəfdaşlıq perspektivlərini və Ukraynaya dəstəyin əsas prioritetlərini müzakirə ediblər. Xüsusilə, birgə müdafiə sənayesinin inkişafı, həm Ukraynada, həm də Böyük Britaniyada müvafiq istehsal müəssisələrinin yaradılması məsələləri diqqət mərkəzində olub. Tərəflər əməkdaşlığın tempinin daha da artırılması istiqamətində birgə fəaliyyət göstərmək barədə razılığa gəliblər.

“Niyyətlərimizin təsdiqi olaraq bu gün elan edə bilərəm ki, daha bir addım irəli atırıq. Ukrayna pilotsuz uçuş aparatlarının müdafiəsini gücləndirmək məqsədilə Ukraynaya yerli elektron mühafizə texnologiyaları təqdim edirik. Bu, hədəflərin daha dəqiq vurulmasına və ukraynalıların həyatının xilas edilməsinə kömək edəcək. Eyni zamanda, bu addım sənayelərimizin birgə əməkdaşlıq nəticəsində hansı innovativ həllər yarada bildiyini nümayiş etdirir”, – deyə Baş nazir qeyd edib.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Böyük Britaniyanın təhlükəsizliyin təmin olunması istiqamətində göstərdiyi səylərin mövcud qlobal çağırışlar fonunda xüsusi əhəmiyyət daşıdığı vurğulanıb.

“Hörmüz boğazında vəziyyət sabit deyil. Rusiya Qara dəniz vasitəsilə Odessadakı limanlarımıza gedən dəniz yollarını bağlamağa çalışır. Biz bunun qarşısını almaq üçün əlimizdən gələni edirik. Hər hansı dəniz yolunun bağlanması təkcə bir ölkənin problemi deyil. Bu, qlobal təhlükəsizliyə və dünya ticarətinə zərbə vurur, dünyanın bir çox ölkəsində insanların həyatını daha bahalı edir”, – deyə Zelenski bildirib.

Görüşdə, həmçinin Ballistik Raket Əleyhinə Koalisiyanın fəaliyyəti, bu istiqamətdə tərəfdaşlarla atılacaq növbəti addımlar, eləcə də “Könüllülər koalisiyası” çərçivəsində əməkdaşlıq məsələləri müzakirə olunub.

Endi Börnhem bildirib ki, Böyük Britaniya “Könüllülər koalisiyası”na həmsədrlik etməyə davam edəcək və avqust ayında keçiriləcək növbəti tərəfdaşlar görüşünün hazırlığında fəal iştirak edəcək.

Baş nazir əlavə edib ki, Ukrayna müharibənin gedişatına təsir göstərərək təşəbbüsü öz əlində saxlamağı davam etdirir. Onun sözlərinə görə, Böyük Britaniya Rusiyaya təzyiqi artırmaq istiqamətində fəaliyyətini davam etdirəcək.