Qulu Məhərrəmli Trampın qərarını “biabırçılıq” adlandırdı

Professor Qulu Məhərrəmli ABŞ prezidenti Donald Trampın Rusiya ilə dizel yanacağı məsələsində əldə etdiyi razılaşmanı tənqid edib. O, bu addımın Ukraynanın maraqlarına zidd olduğunu, Rusiyanın müharibəni davam etdirməsinə maliyyə dəstəyi verə biləcəyini və ABŞ-nin dövlət imicinə ciddi zərbə vurduğunu bildirib.

Citypost.az xəbər verir ki, Qulu Məhərrəmli bu barədə yazısında qeyd edib ki, dizel yanacağı məsələsində Tramp-Putin sövdələşməsi ABŞ prezidenti üçün əxlaqsızlıq, siyasi ləyaqətsizlik və Ukraynanı açıq şəkildə Rusiyaya satmaqdır.

Onun sözlərinə görə, ABŞ-nin Rusiyadan dizel yanacağı alması işğalçı Putinə birbaşa dəstək verməkdir.

“Trampın bu addımı müharibəni dayandırmağa yox, onu uzatmağa yatırılan sərmayədir, ABŞ-nin dövlət imicinə ciddi zərbədir, biabırçılıqdır”, – deyə professor vurğulayıb.

Qulu Məhərrəmli qeyd edib ki, Müharibənin Öyrənilməsi İnstitutunun (ISW) qiymətləndirməsinə görə, Rusiya ABŞ ilə dizel razılaşması müqabilində Ukrayna ilə bağlı heç bir güzəşt təklif etməyib. Əksinə, satışdan gələn əlavə gəlirlər Kremlə Ukraynaya qarşı müharibəni maliyyələşdirməyə davam etmək imkanı verə bilər.

Professorun yazısında bildirilir ki, Donald Tramp dizel razılaşmasını “olduqca mühüm” adlandırsa da, dünya mediası – Reuters, Associated Press, CNN, The Guardian və Axios – Putinlə əldə olunan sövdələşməni tənqidi planda təhlil edir və bunu Ağ Ev üçün son dərəcə xoşagəlməz, iqtisadi effekti isə şübhəli olan addım kimi qiymətləndirir.

Qulu Məhərrəmli Reuters-in mövqeyinə istinad edərək yazıb ki, Rusiya bu sövdələşmədən milyardlarla dollar gəlir əldə edə bilər ki, bu da Putinə müharibəni davam etdirməyə kömək edəcək.

CNN isə “Pickering Energy Partners” şirkətinin rəhbəri Den Pikerinqin sözlərini sitat gətirir: “Əsas məsələ odur ki, bu faydalıdır, lakin qlobal dizel bazarındakı vəziyyəti əhəmiyyətli dərəcədə dəyişməyəcək”.

Telekanalın materialında, həmçinin qeyd olunur: “Trampın həcmləri barellə deyil, tonla qeyd etməsinin bir səbəbi var. Tonla ifadə olunan miqdar sıravi müşahidəçiyə daha çox görünür. Burada real dəyişikliklərdən çox siyasət var”.

Associated Press baş verənləri “Titanik”də şezlonqların yerini dəyişməyə” bənzədən analitik Maykl Linçin fikirlərinə yer verib. Linç izah edib ki, dizelin Rusiyadan alınması mahiyyət etibarilə Rusiya yanacağının hazırkı alıcılarının həmin yanacağı əldə edə bilməməsi ilə nəticələnə bilər. Bu halda onlar başqa mənbələrə üz tutmalı olacaqlar və nəticədə qiymət təxminən indiki səviyyədə qalacaq.

The Guardian bu razılaşmanı ABŞ siyasətində kəskin dönüş adlandırıb və bunun Kremlin üzərinə illərdir tətbiq olunan Qərb təzyiqinin üstündən xətt çəkdiyini vurğulayıb. Qəzet xüsusilə diqqətə çatdırıb ki, Tramp ABŞ və İsrailin İranla müharibəsi nəticəsində yaranan enerji böhranının fəsadlarını Rusiyaya qarşı sanksiyaları zəiflətmək hesabına aradan qaldırmağa çalışır.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Qulu Məhərrəmli Axios nəşrinin Ukrayna prezidenti Volodimir Zelenskinin tənqid və qınaq dolu müsahibəsini dərc etdiyini də qeyd edib. Zelenski razılaşmanı “Putinin ad gününə hədiyyə” və ümumilikdə “dəhşət” adlandırıb.

Ukrayna prezidenti X sosial şəbəkəsində də mövqeyini ifadə edib. O yazıb: “Rusiyaya qarşı sanksiyaların hər hansı şəkildə zəiflədilməsi zəifliyin bariz təzahürüdür. Bu, Rusiyanın xeyrinə işləyir, ona daha çox insanı öldürməyə, müharibəni daha uzun müddət aparmağa, Amerikaya daha az hörmət etməyə və dünyaya daha böyük itkilər və zərər vurmağa şərait yaradır”.

Professorun yazısında vurğulanıb ki, Trampın qərarına qarşı amerikalı qanunvericilər də çıxış ediblər. Demokrat senatorlar bunu Ukraynaya, avropalı müttəfiqlərə və ABŞ-nin milli təhlükəsizliyinə xəyanət adlandırıblar. Onların tələbi isə son dərəcə konkretdir: “Prezident Rusiyanın hərbi maşınını maliyyələşdirmək əvəzinə İranla müharibəsini dayandırmalıdır”.

Respublikaçı Don Bekon da razılaşmanı tənqid edib. O bildirib: “Diktator dinc ukraynalılara zərbələr endirməyə və onları öldürməyə davam etdiyi bir vaxtda ona əlavə pul verərək mükafatlandırmaq yox, məhz indi bu sanksiyalardan Putinin hərbi maşınına təzyiq göstərmək üçün istifadə etmək vaxtıdır”.

Qulu Məhərrəmli diqqətə çatdırıb ki, bütün bunlar ABŞ Konqresinə aralıq seçkilərə bir aydan da az vaxt qalmış, yanacağın rekord qiymətlərinin respublikaçıların səs itirməsi ilə hədələdiyi bir vaxtda baş verir.

Professorun fikrincə, nəticə son dərəcə riyakar görünür: Tramp əvvəlcə İrandakı avantürası ilə qlobal enerji böhranı yaradıb, indi isə hərbi təcavüzkarla sövdələşmə hesabına öz siyasi uğursuzluğunu xilas etməyə çalışır.

“Üstəlik, bu sövdələşmə amerikalıları baha yanacaqdan çətin ki xilas etsin, lakin Rusiyaya müharibəni davam etdirmək üçün pul qazanmağa imkan verəcək”, – deyə Qulu Məhərrəmli yazıb.

Turan

Professor yazısını “Doğrudanmı siyasətdə əxlaq yoxdur?!” sualı ilə yekunlaşdırıb.