Kitab tapırıq ki oxuyaq!!! - SƏRRAF BALAXAN YAZIR

Ölkəmizdə kitab müəllifi olmaqla bağlı qızğın mübarizənin getdiyinə şahidlik edirik. Bu mübarizə əsasən pandemiya dövründə başladı və hazırda ən yüksək səviyyəsinə çatmışdır. İctimai, siyasi, hüquqi, tarixi, iqtisadi, mədəni, dini və fəlsəfi mövzuda mübarizə daha kəskin hal almışdır. Bəzən bir müəllif il ərzində 5-7 kitab çıxarmaq zirvəsinə qədər dırmaşa bilmişdir. 

Taleyin qismətindənmi deyim, bəxtəvərlikdəmi deyim, belə kitabların böyük bir qismi qapı-qapı gəzib-gəzib gəlib axırda məni tapır. Bu kitabların demək olar ki, hamısı eyni formatdadır. Kitabın əvvəlində müəllifin özünə məxsus olduğunu iddia etdiyi bir məqaləsi verilir. Bu bəzən sadəcə ön söz də ola bilir. Qalanı haqqında isə bənd-bənd yazım ki, xalqımızın ərinmədən oxuduğu formada – şeir kimi görünsün:

İctimai mövzuda kitab - əvvəlində məqalə, sonra isə dövlətin və ya hökumətin bu mövzuda qəbul etdiyi qərarların, fərman və sərəncamların surəti, dövlət rəsmilərinin çıxışları və küllü miqdarda şəkillər;

Siyasi mövzuda kitab - əvvəlində məqalə, sonra isə siyasi qərarlar, dövlət rəsmilərinin çıxışları, müsahibləri, təbrik mətnləri;

Hüquqi mövzuda kitab - əvvəlində məqalə, sonra isə yerli və beynəlxalq qanunvericilik aktları, bu aktların qəbul edildiyi binaların cürbəcür şəkilləri;

Tarixi mövzuda kitab - əvvəlində məqalə, sonra isə mütləq və mütləq Gülüstan və Türkmənçay müqavilələri, Çar dövrünün və Sovet dövrünün xəritələri, qala, mağara şəkilləri;

İqtisadi mövzuda kitab - əvvəlində məqalə, sonra isə iqtisadi sahədə qəbul edilmiş hüquqi-normativ aktlar, Statistika Komitəsinin cədvəlləri;

Mədəni mövzuda kitab - əvvəlində məqalə, sonra isə bütün mədəniyyət adamlarının tərcümeyi-halları, mədəni irsin qorunması ilə bağlı yerli və beynəlxalq qanunvericilik aktları, şəkillər, şəkillər;

Dini mövzuda kitab - əvvəlində məqalə, sonra isə bütün müqəddəs kitablardan mövzu ilə bağlı hissələr, hətta bəzən dini kitab bütövlükdə, dualar, peyğəmbərlərdən seçilmiş kəlamlar;

Fəlsəfi mövzuda kitab - əvvəlində məqalə, sonra isə həmin mövzudan bəhs etmiş filosofların hər birindən bir məqalə və ya bütöv bir traktat.

Ən dəhşətli məqam isə budur ki, bu kitabların hamısının üz qabığında ən yuxarıda mütləq şəkildə bold şriftlə şan-şöhrətli müəllifin adı və soyadı həkk olunur.

Sonra da deyirlər, niyə kitab oxumursuz?! Kitab tapırıq ki oxuyaq!!!

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ