Valideyn evdən qovan və ya əl qaldıran övladı nə gözləyir?

Valideynə qarşı zorakılıq, onu yaşadığı evdən zorla çıxarmaq, əşyalarını küçəyə atmaq və fiziki xəsarət yetirmək son dövrlər cəmiyyətdə narahatlıq doğuran hallardan biridir. Belə vəziyyətlərlə üzləşən vətəndaşlar isə çox vaxt hansı hüquqlara malik olduqlarını və hara müraciət etməli olduqlarını bilmirlər.

Citypost.az xəbər verir kii, mütəxəssislərin sözlərinə görə, ilk növbədə hadisənin bütün təfərrüatları araşdırılmalıdır. Çünki hüquqi qiymətləndirmə evin kimə məxsus olmasından, həmin şəxsin evdə hansı hüquqi əsasla yaşamasından, qeydiyyat məsələsindən və zorakılığın hansı formada baş verməsindən asılıdır.

Hüquqşünaslar bildirirlər ki, əgər övlad anasını və ya atasını döyərək evdən çıxarıbsa, əşyalarını küçəyə atıbsa və fiziki xəsarət yetiribsə, bu artıq sadəcə ailədaxili mübahisə hesab edilmir. Belə hərəkətlər cinayət və ya inzibati məsuliyyət yarada biləcək hüquq pozuntusudur.

Mütəxəssislər qeyd edirlər ki, onların icraatında da buna bənzər hadisələr olub. Hətta bəzi hallarda mənzilin çıxarışı ananın adına olsa belə, övlad valideyninə qarşı zor tətbiq edərək onu evdən uzaqlaşdırıb. Belə vəziyyətlərdə hüquqi yolla həmin şəxsin yenidən mənzilə köçürülməsi, hüquqlarının bərpası və təqsirkar şəxsin məsuliyyətə cəlb olunması istiqamətində tədbirlər görülür.

Hüquqşünasların fikrincə, valideynə əl qaldırmaq, onu döymək, qolunu sındırmaq və ya evdən qovmaq heç bir halda qəbul edilə bilməz. Bu, yalnız qanun qarşısında deyil, həm də mənəvi baxımdan ağır və qəbuledilməz davranış hesab olunur.Əgər valideynə fiziki zor tətbiq olunubsa, o, dərhal polisə müraciət etməlidir. Polis tərəfindən hadisə araşdırılmalı, xəsarətin dərəcəsi müəyyən edilməli və zərurət yarandıqda cinayət işi başlanmalıdır. Ailə üzvü olması heç kimi qanun qarşısında məsuliyyətdən azad etmir. Övlad da valideynə qarşı zorakılığa görə qanunvericiliklə müəyyən edilmiş qaydada məsuliyyət daşıya bilər.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Mütəxəssislər bildirirlər ki, qeydiyyatdan çıxarılma məsələsi isə ayrıca hüquqi prosedurdur. Əgər şəxs qeydiyyatdan məhkəmə qərarı ilə çıxarılıbsa, həmin qərarın hansı əsaslarla qəbul edildiyi araşdırılmalıdır. Əgər qeydiyyatdan çıxarılma qanunsuz hesab edilirsə və ya şəxsin hüquqları pozulubsa, bu halda məhkəməyə müraciət etməklə qərardan şikayət vermək mümkündür.Digər tərəfdən, əgər söhbət sadəcə qeydiyyatdan yox, valideynin fiziki olaraq evdən zorla çıxarılmasından gedirsə, bu artıq tamamilə başqa hüquqi məsələdir. Belə hallarda həm zorakılıq faktı, həm də yaşayış hüququ ayrıca qiymətləndirilir.

Hüquqşünaslar vurğulayırlar ki, hər bir iş fərdi qaydada araşdırılır. Mənzilin kimə məxsus olması, valideynin həmin evdə hansı hüquqi statusla yaşaması, evin nə vaxt və necə əldə olunması, qeydiyyatın hansı əsaslarla ləğv edilməsi kimi bütün hallar məhkəmə tərəfindən qiymətləndirilməlidir.

Onların sözlərinə görə, sənədlər və iş materialları tam araşdırılmadan qəti hüquqi nəticə çıxarmaq düzgün deyil. Buna görə də belə vəziyyətlə üzləşən şəxslərə hüquqi yardım almaq, polisə və zərurət olduqda məhkəməyə müraciət etmək tövsiyə olunur. Yalnız hüquqi prosedurlar vasitəsilə həm yaşayış hüququnun bərpasına, həm də zorakılıq törədən şəxsin qanun qarşısında cavab verməsinə nail olmaq mümkündür.

Yeganə