50 yaşdan sonra qadınlar bu xəstəliklərə qarşı diqqətli olmalıdır

Onkoloji xəstəliklər bu gün dünyada ən ciddi sağlamlıq problemlərindən biri kimi qalmaqdadır. Xüsusilə 50 yaşdan sonra qadınlarda bu xəstəliklərə daha tez-tez rast gəlindiyi mütəxəssislər tərəfindən qeyd olunur. Bu yaş dövrü qadın orqanizmində həm hormonal, həm də fizioloji dəyişikliklərin baş verdiyi mərhələ hesab edilir və məhz bu səbəbdən müntəzəm tibbi müayinələrin əhəmiyyəti daha da artır. Bəs 50 yaşdan sonra qadınlarda onkoloji xəstəliklərin çoxalmasının səbəbləri nələrdir?

Ginekoloq Mehriban Musayeva mövzu ilə bağlı Citypost.az-a açıqlamasında bu məsələyə aydınlıq gətirib. O bildirib ki, onkoloji xəstəliklərin yaranmasında bir neçə səbəb qrupu mövcuddur və bunlar yaşla birlikdə daha qabarıq şəkildə özünü göstərə bilir. Həkimin sözlərinə görə, bu səbəblər arasında ətrafımızdakı ekoloji amillər, zərərli vərdişlər, qidalanma tərzi və digər həyat tərzi faktorları mühüm yer tutur. İnsan ömrü boyu bu təsirlərə məruz qaldıqca, onların orqanizmə toplanan təsiri yaşın artması ilə riskin yüksəlməsinə gətirib çıxara bilər.

M.Musayeva vurğulayıb ki, onkoloji xəstəliklərin çoxalmasının əsas səbəblərindən biri də insanların ömür müddətinin uzanmasıdır. Onun sözlərinə görə, əvvəllər orta ömür müddəti daha qısa olduqda bir çox insan onkoloji xəstəliklərin yarandığı yaşa qədər yaşamırdı. Bu gün isə insanlar daha uzun yaşadıqları üçün həmin xəstəliklərlə daha çox qarşılaşırlar. Başqa sözlə, ömrün uzanması bu xəstəliklərin aşkarlanma tezliyinə də təsir göstərir.

Ginekoloq xüsusi olaraq qadınların həkimə gec müraciət etməsi problemini qeyd edib. Onun sözlərinə görə, qadınlar, xüsusilə menopauzadan sonra, vaxtında müayinəyə getmir, ətrafdakı insanların məsləhətləri ilə hərəkət edir və yaranan şikayətlərə lazımi əhəmiyyət vermirlər. Həkim bildirib ki, bu yanaşma xəstəliyin ilkin mərhələdə aşkarlanmasına mane olur. Halbuki onkoloji xəstəliklərdə erkən diaqnoz müalicənin uğurunu əhəmiyyətli dərəcədə artırır. Qeyri-adi ifrazat, qanaxma, ağrı və ya digər şikayətlər yarandıqda isə “keçib gedər” düşüncəsi ilə gözləmək yolverilməzdir.

M.Musayeva əlavə edib ki, 50 yaş dövrü endometrium (uşaqlıq selikli qişası) xərçəngi və uşaqlıq boynu xərçəngi kimi onkoloji xəstəliklərin ən çox başladığı dövrlərdən biridir. Onun sözlərinə görə, bu yaşda qadınlar xüsusilə diqqətli olmalı və ginekoloji müayinələri ciddi qəbul etməlidirlər. Mütəmadi müayinələrin ləngidilməsi və ya tamamilə ixtisar edilməsi bu xəstəliklərin erkən mərhələdə aşkarlanmasına və qarşısının alınmasına imkan vermir.

Ginekoloq qadınlara tövsiyə edib ki, yaşından asılı olmayaraq, mütəmadi olaraq ginekoloq müayinəsindən keçsinlər, menopauza dövründə isə bu müayinələri daha da ciddi qəbul etsinlər. Onun fikrincə, düzgün qidalanma, zərərli vərdişlərdən uzaq durmaq, sağlam həyat tərzi və vaxtında həkimə müraciət onkoloji xəstəliklərin riskini azaltmağın və xəstəliyi erkən mərhələdə aşkar etməyin əsas yoludur.

M.Musayeva vurğulayıb ki, qadınlar öz sağlamlıqlarına məsuliyyətlə yanaşmalı, ətrafdakıların təsiri ilə deyil, mütəxəssis həkimin rəyinə əsaslanaraq qərar verməlidirlər. Həkim qeyd edib ki, vaxtında atılan addım, çox hallarda, həyatı xilas edən addımdır.

Yeganə 

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ