Artrozun gizli əlamətləri hansılardır?

Gecələr diz ağrısı sizi yuxudan oyadırsa, pilləkən qalxarkən dizlərinizdən xırtıltı səsləri gəlirsə və ya səhərlər ilk addımlarınızı atmaqda çətinlik çəkirsinizsə, bu əlamətlər artrozun ilk xəbərdaredici siqnalları ola bilər. Bir çox insan bu şikayətləri yaşın artması ilə əlaqələndirib normal hesab etsə də, mütəxəssislər bildirirlər ki, bu cür əlamətlər vaxtında qiymətləndirilmədikdə oynaq qığırdağında baş verən dəyişikliklər daha da dərinləşə və xəstəliyin gedişi sürətlənə bilər.

Citypost.az xəbər verir ki, artroz oynaqlarda yerləşən qığırdaq toxumasının tədricən aşınması ilə xarakterizə olunan xroniki xəstəlikdir. Xəstəliyin ilkin mərhələlərində ağrı yalnız hərəkət zamanı hiss olunsa da, zaman keçdikcə istirahət zamanı, hətta gecə saatlarında da narahatlıq yarada bilər. Səhərlər oyanarkən dizlərdə sərtlik hissinin olması, bir neçə dəqiqə hərəkət etdikdən sonra bu hissin azalması, uzun müddət oturduqdan sonra ayağa qalxarkən çətinlik yaşanması artrozun ən çox rast gəlinən əlamətlərindəndir.

Mütəxəssislərin sözlərinə görə, artrozun yaranmasında yaş faktoru ilə yanaşı artıq çəki, oynaqlara uzunmüddətli yük düşməsi, əvvəlki travmalar, irsi meyillilik və bəzi maddələr mübadiləsi pozğunluqları da mühüm rol oynayır. Xüsusilə diz və bud-çanaq oynaqları bu xəstəlikdən daha çox zərər görür. Xəstəliyin irəliləməsi ilə birlikdə oynaqlarda hərəkət məhdudiyyəti yaranır, pilləkən qalxmaq, çömbəlmək, uzun məsafə yerimək və gündəlik məişət işlərini görmək belə çətinləşə bilir.

Həkimlər vurğulayırlar ki, artrozun qarşısını almaq və ya inkişafını ləngitmək üçün düzgün həyat tərzi böyük əhəmiyyət daşıyır. İlk növbədə bədən çəkisini normal saxlamaq, müntəzəm, lakin oynaqlara zərər verməyən fiziki aktivliklə məşğul olmaq, üzgüçülük və yüngül gəzintilər etmək tövsiyə olunur. Oynaqları həddindən artıq yükləyən hərəkətlərdən isə mümkün qədər uzaq durmaq lazımdır.Qidalanma da oynaq sağlamlığında mühüm rol oynayır. Orqanizmdə kalsium, maqnezium və D vitamini çatışmazlığı sümük və oynaq sisteminə mənfi təsir göstərə bilər. Buna görə də həkim məsləhəti ilə bu maddələrin səviyyəsinin yoxlanılması və ehtiyac olduqda əlavələr şəklində qəbul edilməsi faydalı hesab olunur. Bundan başqa, qığırdaq toxumasının qidalanmasını dəstəkləmək məqsədilə istifadə olunan xondroprotektor preparatları da bəzi hallarda həkim tərəfindən təyin edilə bilər. Mütəxəssislər bildirirlər ki, bu preparatlar yalnız düzgün diaqnoz qoyulduqdan və uyğun müalicə sxemi seçildikdən sonra qəbul edilməlidir.Qeyd edilir ki, dizlərdən gələn səs hər zaman artroz demək olmasa da, bu səs ağrı, şişkinlik və hərəkət məhdudiyyəti ilə müşayiət olunursa, mütləq ortoped-travmatoloq və ya revmatoloqa müraciət etmək lazımdır. Erkən diaqnoz və vaxtında başlanılan müalicə xəstəliyin irəliləməsinin qarşısını almaqda, oynaq funksiyasını uzun illər qorumaqda və cərrahi müdaxiləyə ehtiyacı gecikdirməkdə mühüm rol oynayır.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Mütəxəssislər xatırladırlar ki, artrozun müalicəsində məqsəd yalnız ağrını azaltmaq deyil, həm də oynağın funksiyasını qorumaq və insanın həyat keyfiyyətini yüksəltməkdir. Buna görə də diz ağrısını "yaşla bağlı normal hal" kimi qəbul etmək əvəzinə, ilk əlamətlərdən etibarən həkim müayinəsindən keçmək və fərdi müalicə planına əməl etmək daha doğru yanaşma hesab olunur. Sağlam oynaqların qorunması üçün profilaktik tədbirlər və düzgün müalicə gələcəkdə daha ciddi problemlərin qarşısını almağa kömək edə bilər.

Yusif