Şah damarının tutulması necə bilinir? HƏKİMLƏR AÇIQLADI

Şah damarının (karotid arteriyanın) tutulması barədə cəmiyyətdə çoxsaylı yanlış təsəvvürlər mövcuddur. Bir çox insan düşünür ki, boyunda ağrı, keyimə və ya gərginlik hiss edirsə, bu, mütləq şah damarının tutulmasının əlamətidir. Halbuki mütəxəssislərin sözlərinə görə, şah damarının daralması və ya tutulması çox vaxt heç bir əlamət vermədən inkişaf edir və məhz buna görə də ən təhlükəli damar xəstəliklərindən biri hesab olunur.

Citypost.az xəbər verir ki, kardioloqlar bildirirlər ki, şah damarının tutulmasının ən böyük əlaməti əslində əlamətsiz keçməsidir. Yəni xəstə uzun illər özünü tam normal hiss edə bilər. Damar daxilində aterosklerotik lövhələr yavaş-yavaş böyüyür, lakin insan bunu hiss etmir. Problem yalnız damar ciddi dərəcədə daraldıqda və ya həmin lövhədən qopan laxta beyinə getdikdə üzə çıxır.

Mütəxəssislərin sözlərinə görə, bu səbəbdən şah damarının tutulması simptom gözlənilən xəstəlik deyil. Xəstəliyin aşkarlanması üçün yalnız şikayətlərin olmasını gözləmək düzgün yanaşma sayılmır. Əksinə, risk qrupunda olan insanlar mütəmadi müayinədən keçməlidirlər.Risk qrupuna ilk növbədə 60 yaşdan yuxarı şəxslər, uzun illər siqaret çəkənlər, yüksək təzyiqdən əziyyət çəkənlər, şəkərli diabet xəstələri, yüksək xolesterini olanlar, artıq çəkidən əziyyət çəkənlər və ürəyin tac damarlarında ateroskleroz aşkarlanmış insanlar daxildir. Bu şəxslərdə şah damarlarında da daralma ehtimalı daha yüksək olur.

Həkimlər vurğulayırlar ki, boyunda ağrı, çiyin nahiyəsində gərginlik və ya ara-sıra yaranan keyimə hissi şah damarının tutulmasına xas əlamətlər deyil. Buna görə də yalnız bu şikayətlərə əsaslanaraq belə diaqnoz qoymaq mümkün deyil.Şah damarının tutulması özünü daha çox beyin qan dövranının pozulması ilə göstərə bilər. Əgər damardakı lövhədən qopan laxta beyinə gedərsə, insult riski yaranır. Belə hallarda üzün bir tərəfində qəfil keyimə və ya sallanma, qol və ya ayaqda gücsüzlük, nitq pozğunluğu, danışmaqda və ya deyilənləri başa düşməkdə çətinlik, görmənin qəfil zəifləməsi, tarazlığın itməsi kimi əlamətlər meydana çıxa bilər. Bu hallar artıq təcili tibbi yardım tələb edən vəziyyət hesab olunur.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Kardioloqlar bildirirlər ki, şah damarının tutulmasının erkən aşkarlanmasının ən etibarlı üsullarından biri şah damarının ultrasəs (Doppler) müayinəsidir. Bu müayinə tam ağrısız, təhlükəsiz və qısa müddətdə həyata keçirilir. Ultrasəs vasitəsilə damar divarında lövhələrin olub-olmaması, damar mənfəzinin nə dərəcədə daraldığı və qan axınının vəziyyəti qiymətləndirilə bilir.Mütəxəssislər hesab edirlər ki, xüsusilə yüksək risk qrupuna daxil olan insanların heç bir şikayəti olmasa belə, profilaktik məqsədlə şah damarlarının Doppler müayinəsindən keçməsi gələcəkdə insultun qarşısının alınmasında mühüm rol oynaya bilər.

Həkimlər sonda bir daha xatırladırlar ki, şah damarının tutulması səssiz inkişaf edən, lakin ağır nəticələrə səbəb ola bilən xəstəlikdir. Buna görə də simptomların yaranmasını gözləmək əvəzinə, risk faktorları olan şəxslərin vaxtında müayinədən keçməsi və həkim tövsiyələrinə əməl etməsi sağlamlığın qorunması baxımından böyük əhəmiyyət daşıyır. Erkən diaqnostika həm insult riskini azaltmağa, həm də damar sağlamlığını uzun müddət qorumağa imkan verir.

Yusif