Aritmiyası olanlara idman etmək olarmı? – Kardioloqdan vacib açıqlama

Ürək ritmində pozğunluq yaşayan insanların bir çoxu fiziki aktivlikdən uzaq durmağa çalışır. Xüsusilə səyirici aritmiyası olan pasiyentlər arasında idmanın ürəkdöyünməsini artıracağı, aritmiya tutmalarını çoxaldacağı və vəziyyəti ağırlaşdıra biləcəyi ilə bağlı narahatlıqlar geniş yayılıb. Lakin mütəxəssislər bildirirlər ki, düzgün seçilmiş və nəzarət altında həyata keçirilən fiziki aktivlik bəzi pasiyentlər üçün əksinə, ürək-damar sağlamlığına müsbət təsir göstərə bilər.

Kardioloq Üzeyir Rəhimov Citypost.az-a açıqlamasında səyirici aritmiyası olan şəxslərdə fiziki aktivliyin mümkün təsirlərindən danışıb.

Həkim bildirib ki, uzun müddət həm pasiyentlər, həm də bəzi hallarda həkimlər səyirici aritmiyası olan insanların idmanla məşğul olmasına ehtiyatla yanaşıblar. Bunun əsas səbəbi fiziki yükün ürəkdöyünməsini sürətləndirərək aritmiya tutmasına səbəb ola biləcəyi ilə bağlı narahatlıqdır. Lakin son dövrdə aparılan araşdırmalar bu məsələyə daha fərqli yanaşmağa əsas verir.

“Bilirsiniz ki, həm həkimlər, həm də xəstələr, xüsusilə də səyirici aritmiyası olan insanlara idman etdirməkdən çəkinirlər ki, pisləşə bilərlər. Bu yaxınlarda tam da bu sualla bağlı Norveçdən bir çalışma yayımlandı. Bu çalışmada səyirici aritmiyası olan təxminən 300 pasiyent iştirak edib. Onlar iki qrupa bölünüblər. Bir qrup bir il ərzində müəyyən edilmiş proqram üzrə fiziki məşqlər edib, digər qrup isə nəzarət qrupu olub və xüsusi idman proqramına cəlb edilməyib”, – deyə kardioloq qeyd edib.

Onun sözlərinə görə, bir il sonra aparılan müqayisə zamanı fiziki aktivlik proqramında iştirak edən pasiyentlərdə səyirici aritmiya tutmalarının daha az müşahidə olunduğu və ürək-damar vəziyyətində müəyyən müsbət dəyişikliklərin olduğu görülüb.

“Bir il sonrasında bunları müqayisə ediblər. Müqayisə nəticəsində səyirici aritmiya tutma ehtimalı idman edənlərdə 45 faiz daha az olub. Xəstəxanaya yatış halları da daha aşağı olub və onların ürəkdöyünmə tezliyi azalıb”, – deyə Ü.Rəhimov bildirib.

Kardioloq vurğulayıb ki, burada əsas məsələ sadəcə idman etmək deyil, fiziki yükün düzgün seçilməsidir. Aritmiyası olan hər bir insan üçün eyni məşq proqramının uyğun olduğunu düşünmək düzgün deyil. Fiziki aktivliyin növü, intensivliyi və müddəti pasiyentin ümumi sağlamlıq vəziyyətinə, ürəyin funksional imkanlarına, aritmiyanın xüsusiyyətlərinə və yanaşı xəstəliklərə uyğun müəyyənləşdirilməlidir.

Mütəxəssisin sözlərinə görə, səyirici aritmiyası olan şəxslər fiziki aktivliyə aşağı intensivlikdən başlamalı və yükü tədricən artırmalıdırlar. Birdən-birə yüksək intensivlikli məşqlərə keçmək ürəyə əlavə yük yarada bilər.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

“Amma burada diqqət ediləcək əsas məsələ hansı idmanların seçilməsidir. Həftədə beş saatdan çox idman tövsiyə edilmir. Yüksək intensivlikli, zalda ağır çəkilərlə edilən məşqlərin də həftədə 60-90 dəqiqədən artıq olması tövsiyə edilmir”, – deyə həkim bildirib.

Üzeyir Rəhimov yarış xarakterli idman növlərinə də xüsusi diqqət çəkib. Onun sözlərinə görə, səyirici aritmiyası olan şəxslərin yüksək fiziki və emosional gərginlik tələb edən yarışmalı idman növlərinə başlaması məqsədəuyğun deyil. Belə məşqlər zamanı ürək döyüntüsünün kəskin sürətlənməsi və orqanizmin stressə məruz qalması aritmiya baxımından əlavə risk yarada bilər.

“Yarışmalı idmanlar olmaz və idman aşağı sürətdən başlayıb tədricən artırılmalıdır”, – deyə kardioloq vurğulayıb.

Mütəxəssis qeyd edib ki, səyirici aritmiyası olan şəxslər fiziki aktivliyi tamamilə dayandırmaq əvəzinə, ilk növbədə həkim müayinəsindən keçməli və öz vəziyyətlərinə uyğun məşq proqramı müəyyənləşdirməlidirlər. Xüsusilə uzun müddət fiziki aktivlik etməyən, yanaşı ürək-damar xəstəlikləri olan və ya tez-tez aritmiya tutmaları yaşayan şəxslərin özbaşına intensiv məşqlərə başlaması düzgün yanaşma hesab edilmir.

Ümumilikdə isə müntəzəm və düzgün planlaşdırılmış fiziki aktivlik sağlam həyat tərzinin mühüm hissəsidir. Aritmiyası olan şəxslərdə də əsas məqsəd hərəkətsiz qalmaq deyil, ürəyin vəziyyətinə uyğun təhlükəsiz fiziki yük seçməkdir. Bunun üçün məşqlərin intensivliyi və müddəti fərdi şəkildə müəyyənləşdirilməli, fiziki aktivlik zamanı yaranan qeyri-adi ürəkdöyünmə, sinə ağrısı, başgicəllənmə, güclü nəfəs darlığı və ya halsızlıq kimi əlamətlərə laqeyd yanaşılmamalıdır.

Həkimlər bildirirlər ki, səyirici aritmiya diaqnozu fiziki aktivliyin avtomatik olaraq qadağan edilməsi demək deyil. Lakin idmana başlamazdan əvvəl pasiyentin vəziyyəti qiymətləndirilməli və məşq proqramı həkim nəzarəti ilə müəyyənləşdirilməlidir.

Yeganə