"Türkiyə təhlükəsiz Suriyanın yaradılmasına hər cür töhfə verəcək"-Fidan

Türkiyənin xarici işlər naziri Hakan Fidan əmin edib ki, Ankara təhlükəsiz, azad və firavan Suriyanın qurulmasına hər cür töhfə verəcək.

Citypost.az xəbər verir ki, o, bu barədə bazar günü Dəməşqdə Suriyanın yeni hakimiyyətinin başçısı Əhməd əl-Şara (Əbu Məhəmməd əl-Culani ləqəbi ilə tanınır) ilə danışıqlardan sonra X-də yazıb.

“Uzun illərdən sonra etdiyimiz bu səfər Suriya xalqı üçün yeni, ümidverici dövrə doğru ilk addım olacaq. Biz ona bütün sahələrdə dəstək verməyə hazırıq”, - deyə Fidan bildirib.

Onun sözlərinə görə, Türkiyənin Suriya ilə bağlı prioritetləri sabitliyin və təhlükəsizliyin təmin edilməsi, terrorun aradan qaldırılması, milli barışığa nail olunması, iqtisadi inkişafın təmin edilməsi və ölkəni tərk etmiş suriyalıların vətənlərinə qayıtmasına şərait yaradacaq şəraitin yaradılması ilə bağlıdır. "Türkiyə təhlükəsiz, azad və firavan Suriyanın yaradılmasına hər cür töhfə verəcək", - Türkiyənin xarici işlər naziri vurğulayıb.

Yeganə