Zelenski Çinin Ukrayna üzrə danışıqlarda iştirakını istisna etmir

Kiyev rejiminin başçısı Volodimir Zelenski Çinin Ukraynadakı münaqişənin həlli üzrə danışıqlarda iştirakının mümkünlüyünü istisna etmir.

Citypost.az xəbər verir ki, Ukrayna lideri BƏƏ-də keçirdiyi mətbuat konfransında bildirib ki, Çinin Ukrayna ilə bağlı danışıqlarda iştirakı istisna deyil.

Onun sözlərinə görə, Çin təhlükəsizlik zəmanəti verə və Ukraynanın yenidən qurulmasına kömək edə bilər.

"Çinlə bağlı biz həmişə ciddi oyunçuların iştirakına hazır olduğumuzu demişik", - Ukrinform agentliyi mətbuat konfransından sitat gətirir. Zelenski hesab edir ki, danışıqlar masasında Ukraynanın bərpasına təhlükəsizlik zəmanəti, yardım və sərmayə üçün məsuliyyəti öz üzərinə götürməyə hazır olanlar olacaq.

Həmin mətbuat konfransında Kiyev rejiminin başçısı bildirib ki, o, Rusiya və ABŞ arasında Səudiyyə Ərəbistanında keçiriləcək danışıqların nəticələrini tanımır, çünki Ukrayna danışıqlarda iştirak etmir.

Daha əvvəl Rusiya prezidentinin mətbuat katibi Dmitri Peskov bildirib ki, Rusiya xarici işlər naziri Sergey Lavrov və prezidentin köməkçisi Yuri Uşakov Rusiya dövlət başçısı Vladimir Putinin tapşırığı ilə ABŞ nümayəndələri ilə görüşmək üçün Səudiyyə Ərəbistanına gedəcəklər. Görüş fevralın 18-də baş tutacaq və Rusiya ilə ABŞ arasında münasibətlərin bərpasına həsr olunacaq.

Yeganə