Lavrov: "Baydenin siyasəti dolların mövqeyini sarsıtdı"

"ABŞ-ın əvvəlki prezidenti Co Baydenin siyasəti dolların ehtiyat valyuta kimi mövqeyini sarsıdıb".

Citypost.az xəbər verir ki, bunu Rusiya xarici işlər naziri Sergey Lavrov Dövlət Dumasında hökumət saatında deyib.

BRİKS ölkələrinin iqtisadi perspektivləri ilə bağlı sualı cavablandıran Rusiya xarici işlər naziri Baydenin siyasətinin valyuta problemlərinə səbəb olduğunu qeyd edib.

"ABŞ-ın əvvəlki administrasiyasının siyasəti dolların mövqeyini sarsıtdı və digər ölkələri özləri üçün alternativ ödəniş variantları hazırlamağa məcbur etdi", - Lavrov bildirib. Braziliya lideri Luiz İnasio Lula da Silvanın təşəbbüsü ilə Kazanda keçirilən BRİKS-in sonuncu sammitində alternativ ödəniş platformaları ilə bağlı təkliflər müzakirə edilib.

“Alternativ ödəniş platformaları BRİKS ölkələrinin xarici şoklara davamlılığını artıracaq”, - Lavrov yekunlaşdırıb.

Bundan əvvəl Lavrov bildirmişdi ki, Rusiya və ABŞ nümayəndələrinin Ər-Riyaddakı görüşü zamanı müzakirə etdikləri mövzular arasında bank köçürmələri ilə bağlı məhdudiyyətlər var. Tərəflər belə qənaətə gəliblər ki, normal münasibətlərin inkişafını çətinləşdirən bu narahatlıqlara birdəfəlik son qoymaq üçün problemin həllinə sistemli yanaşmaq lazımdır.

Yeganə