Öldürülən fələstinlilərin sayı 48 min 319-a yüksəldi

İsrailin 471 günlük fasiləsiz hücumlarından sonra atəşkəsin əldə edildiyi Qəzza zolağında son 24 saatda dağıntılar altından çıxarılan 22 fələstinlinin cəsədi xəstəxanalara çatdırılıb.

Citypost.az xəbər verir ki, Qəzzadakı Fələstin Səhiyyə Nazirliyi yanvarın 19-da İsrail ilə Həmas arasında əldə olunan atəşkəs və əsir mübadiləsi razılaşmasından sonra İsrail ordusunun hücumları nəticəsində ölən və yaralananlarla bağlı son məlumatı paylaşıb.

Bildirilib ki, son 24 saat ərzində dağıntılar altından 22 nəfərin cəsədi çıxarılıb, 16 yaralı isə xəstəxanalara çatdırılıb. İsrailin Qəzza zolağına 2023-cü il oktyabrın 7-dən atəşkəsin elan olunduğu 19 yanvara qədər davam edən hücumlarında həyatını itirən fələstinlilərin sayının 48 min 319-a, yaralı sayının isə 111 min 749-a yüksəldiyi qeyd edilib.

HƏMAS ilə əldə olunan atəşkəs və əsir mübadiləsi razılaşmasına baxmayaraq, İsrail Qəzzada atəşkəsi tez-tez pozur. Qəzza Səhiyyə Nazirliyinin baş direktoru Munir əl-Burş fevralın 11-də verdiyi yazılı açıqlamada atəşkəs razılaşmasından sonra İsrailin Qəzza zolağına birbaşa hücumları nəticəsində 92 fələstinlinin həyatını itirdiyini açıqlayıb.

Yeganə