Sahib Alıyev: “Ermənistan üzərinə götürdüyü öhdəlikləri yerinə yetirmir”

Milli Məclisin deputatı Sahib Alıyev Ermənistanın xarici işlər naziri Ararat Mirzoyanın Cənubi Qafqazda sülhün konkret addımlarla möhkəmləndirilməli olduğu barədə açıqlamasına münasibət bildirib.

Citypost.az xəbər verir ki, deputat sosial şəbəkə hesabında paylaşım edərək Ermənistanın sülh istiqamətində üzərinə götürdüyü öhdəlikləri yerinə yetirmədiyini, Azərbaycanın isə konkret addımlarla sülh prosesinə töhfə verdiyini vurğulayıb.

Sahib Alıyev qeyd edib ki, Vaşinqton anlaşmasından sonra atılan addımlar Azərbaycanın sülh təşəbbüsünün irəli sürülməsində olduğu kimi, onun praktiki müstəvidə möhkəmləndirilməsində də əsas rol oynadığını göstərir. Onun sözlərinə görə, Azərbaycan Ermənistana öz dəmir yolu vasitəsilə yüklərin daşınmasına imkan yaradıb, eyni zamanda yanacaq qıtlığının yaşandığı bir vaxtda bu ölkəyə neft məhsulları göndərir.

Sahib Alıyev bildirib ki, Ermənistan Elm, Təhsil, Mədəniyyət və İdman Nazirliyi, eləcə də İrəvan Meriyasının maliyyə dəstəyi göstərdiyi filmdə Monte Melkonyanın qəhrəman obrazında təqdim olunması ciddi suallar doğurur. Deputat Melkonyanı ASALA terror təşkilatının rəhbərlərindən biri, Avropada türk diplomatlarına və mülki obyektlərə qarşı törədilmiş terror aktlarının təşkilatçılarından biri, həmçinin Azərbaycan torpaqlarının işğalında və Qaradağlı faciəsində iştirak etmiş şəxs kimi xarakterizə edib.

Onun fikrincə, belə bir şəxsin bədii film vasitəsilə qəhrəmanlaşdırılması sülhün möhkəmləndirilməsinə xidmət etmir. Deputat bu addımın Ermənistanın sülh bəyanatları ilə real siyasəti arasında ziddiyyət yaratdığını bildirib.

Milli Məclisin üzvü Ararat Mirzoyanın oktyabrın 28-də Ermənistan parlamentində səsləndirdiyi fikirlərə də münasibət bildirib. Qeyd edək ki, Ermənistan XİN rəhbəri həmin çıxışında Azərbaycan Prezidentinin köməkçisi Hikmət Hacıyevin Monte Melkonyanın törətdiyi əməllərə görə Ermənistanın və erməni cəmiyyətinin Azərbaycandan üzr istəməli olduğu barədə çağırışının sülhə xidmət etmədiyini söyləmişdi.

Sahib Alıyev isə hesab edir ki, qonşu xalqlara qarşı uzun illər ərzində törədilmiş zorakılıqlara görə üzr istənilməməsi gələcəkdə eyni hadisələrin təkrarlanmayacağına dair etimadı zəiflədir.

Deputat vurğulayıb ki, Ermənistan bir tərəfdən sülhün konkret addımlarla möhkəmləndirilməsindən danışırsa, digər tərəfdən Azərbaycan xalqına qarşı törədilmiş faciələrdə adı hallanan şəxsləri qəhrəman kimi təqdim etməməlidir. Onun qənaətinə görə, davamlı sülh üçün yalnız siyasi bəyanatlar deyil, həm də keçmişlə bağlı obyektiv mövqe və real addımlar vacibdir.

Həmçinin oxuyun

İlham Əliyevin adından saxta məlumat YAYILIR -DİQQƏT!

Quşlar yüksək gərginlikli elektrik xətlərində dayanır-Bəs niyə elektrik onları vurmur?

Qatarla gedənlərə ŞAD XƏBƏR!Bilet ucuzlaşdı

Prezidentin Mətbuat Xidməti MƏLUMAT YAYDI

Turan