Rafiq Əliyevdən Halloween-ə SƏRT ETİRAZ: “Milli dəyərlərimizə uyğun deyil”

Fəlsəfə elmləri doktoru, professor Rafiq Əliyev Halloween bayramının Azərbaycanda yayılması və xüsusilə gənclər arasında maraq doğurması ilə bağlı narahatlığını ifadə edib. O, bu cür ənənələrin milli-mənəvi dəyərlərə, cəmiyyətin dünyagörüşünə və gənc nəslin tərbiyəsinə təsirləri barədə fikirlərini bölüşüb.

Citypost.az xəbər verir ki, professor bu barədə qələmə aldığı “Yad ənənələr və yerli dəyərlər: Halloween Azərbaycanda niyə narahatlıq doğurur?” adlı yazısında qeyd edib ki, son illərdə oktyabr ayının sonlarında Halloween ətrafında müzakirələr daha da intensivləşir. Onun sözlərinə görə, bəzi gənclər və əyləncə məkanları bu günü sadəcə kostyum partiyası və əyləncə fürsəti kimi qəbul etsələr də, cəmiyyətin digər kəsimləri, dini xadimlər və ənənəvi dəyərlərə bağlı insanlar bu tendensiyaya ehtiyatla yanaşırlar.

Rafiq Əliyev bildirib ki, Halloween tarixi baxımdan qədim keltlərin bütpərəst inanclarına, xüsusilə də oktyabrın 31-dən noyabrın 1-nə keçən gecə qeyd edilən Samhain mərasiminə gedib çıxır. Həmin inanclara görə, bu gecə canlılar və ölülər dünyası arasındakı sərhədin aradan qalxdığı, ruhların və fövqəltəbii qüvvələrin sərbəst hərəkət etdiyi düşünülürdü.

Professorun fikrincə, Halloween-in müasir təqdimatında ön plana çıxarılan qorxulu obrazlar, mistik simvollar, cadugər, skelet, vampir və demon təsvirləri Azərbaycanın mənəvi dəyərləri ilə uzlaşmır. O vurğulayıb ki, ölkəmizdə mövcud olan ənənəvi dini dünyagörüşü və mənəvi prinsiplər dünyasını dəyişənlərin xatirəsinə hörmətlə yanaşmağı təşviq etsə də, şər qüvvələrlə bağlı təsvirlərin əyləncə predmetinə çevrilməsini qəbul etmir.

Rafiq  Əliyev Azərbaycanın zəngin mədəni irsə, dərin tarixi ənənələrə, ailə dəyərlərinə və böyüklərə hörmət prinsipinə malik olduğunu xatırladıb. Onun sözlərinə görə, milli bayramlarımızın mahiyyətində sevinc, yenilənmə, təbiətin canlanması və quruculuq kimi müsbət məqamlar dayanır. Bu baxımdan, Halloween-in qorxu və qaranlıq simvolikası üzərində qurulan əyləncə forması kimi təqdim edilməsi cəmiyyətdə haqlı suallar doğurur.

Professor hesab edir ki, kommersiya xarakterli bu cür tədbirlər vasitəsilə Qərb kütləvi mədəniyyətinin müəyyən elementləri cəmiyyətə daxil olur və nəticədə milli kimliyin zəifləməsi riski yaranır. O, xüsusilə uşaqların və yeniyetmələrin belə təsirlərə qarşı daha həssas olduğunu qeyd edərək, onların yaş xüsusiyyətlərini nəzərə almadan qorxu və mistika üzərində qurulan obrazlara cəlb edilməsinin mənfi nəticələr doğura biləcəyini bildirib.

Rafiq  Əliyev qeyd edib ki, Halloween tərəfdarları bu ənənəni qloballaşma, müasirlik və əyləncə ilə əlaqələndirsələr də, əsas müzakirə mövzusu cəmiyyətin öz milli-mənəvi irsinə münasibəti olmalıdır. Onun fikrincə, başqa mədəniyyətlərə aid ənənələri mənimsəyərkən onların mahiyyətinə və daşıdığı mesajlara diqqət yetirmək vacibdir.

Professor vurğulayıb ki, milli kimliyin qorunması, gənc nəslin xeyirxahlıq, quruculuq və öz mədəniyyətinə hörmət ruhunda tərbiyə olunması xüsusi əhəmiyyət daşıyır. Onun qənaətinə görə, milli ənənələrə sahib çıxmaq və yad təsirlərə qarşı düşünülmüş mövqe nümayiş etdirmək cəmiyyətin mənəvi dəyərlərinin qorunmasının əsas şərtlərindəndir.

Həmçinin oxuyun

Sərəncam bu  gündən qüvvəyə minir

İlham Əliyevin adından saxta məlumat YAYILIR -DİQQƏT!

Quşlar yüksək gərginlikli elektrik xətlərində dayanır-Bəs niyə elektrik onları vurmur?

Qatarla gedənlərə ŞAD XƏBƏR!Bilet ucuzlaşdı