ABŞ-da ömürlük həbs cəzası çəkən qatil 10 günlük axtarışdan sonra saxlanılıb

ABŞ-da qətl törətməkdə təqsirli bilinərək ömürlük həbs cəzasına məhkum edilmiş 28 yaşlı Ceykob Morli həbsxanadan qaçdıqdan 10 gün sonra Missuri ştatında saxlanılıb.

Citypost.az xəbər verir ki, bu barədə “Associated Press” (AP) agentliyi məlumat yayıb.

Məlumata görə, Morli oktyabrın 25-də Tennessi ştatının şimal-qərbində yerləşən “Northwest Correctional Complex” həbsxanasında hasardan keçərək qaçıb. Həmin vaxt həbsxana geyimində olan məhkum yaxınlıqdakı fermadan avtomobil oğurlayaraq ərazini tərk edib. Daha sonra avtomobili İllinoys ştatının Marion şəhəri yaxınlığında qoyaraq piyada hərəkətini davam etdirib.

İstintaqın məlumatına əsasən, Morli fermadakı ovçuların vaxtaşırı istifadə etdiyi yardımçı tikilidə bir müddət gizlənib. O, burada pivə içib, yemək hazırlayıb və fermadan başqa bir avtomobil, geyimlər, iki tüfəng və bir ov tüfəngi oğurlayıb. Avtomobili götürərkən isə geridə üzrxahlıq məzmunlu əl yazısı ilə qeyd qoyub.

Uilyamson dairəsinin şerifi Ceff Didrix bildirib ki, Morlinin Marion şəhərinə necə gəlib çıxması hələ də müəmmalıdır. Onun sözlərinə görə, şübhəlinin qaçış zamanı hər hansı şəxsdən kömək aldığına dair sübut yoxdur. Təhlükəsizlik kameraları onun avtomobildən düşərək piyada hərəkət etdiyini qeydə alsa da, ərazinin meşəlik və açıq sahələrdən ibarət olması axtarışı çətinləşdirib.

Morli noyabrın 3-də səhər saatlarında Kanzas-Siti yaxınlığında, 70 nömrəli magistral yol istiqamətində hərəkət edərkən yol kameraları və helikopter vasitəsilə izlənilib. Onun idarə etdiyi yük avtomobili palçığa bataraq hərəkətsiz qalıb. Bundan sonra hüquq-mühafizə orqanlarının əməkdaşları onu saxlayıblar. Avtomobildən iki tüfəng və bir ov tüfəngi götürülüb.

Həmçinin oxuyun

Bunu edən sürücülər cərimələnəcək - 100 manat və 2 bal

Noyabrın 5-i ilə bağlı rəsmi xəbərdarlıq

Prezidentdən nazirin qayınatası ilə bağlı SƏRƏNCAM

Prezidentin yüksək vəzifə verdiyi şəxs görün KİMİN OĞLUDUR

Saxlanılan şəxs Missuri ştatının Leksinqton şəhərindəki Lafayet dairəsi həbsxanasına aparılıb. Hazırda onun Missuri və İllinoys ştatlarında, eləcə də federal səviyyədə əlavə ittihamlarla üzləşə biləcəyi bildirilir. Tennessi ştatının prokuroru Denni Qudman Morliyə qarşı yeni ittihamların irəli sürüləcəyini açıqlasa da, onun Tennessiyə nə vaxt qaytarılacağı hələ məlum deyil.

Qeyd edək ki, Morli 2022-ci ildə iş yoldaşı Kodi Biçfildin qətlində təqsirli bilinib. Biçfildin meyiti bir neçə həftəlik axtarışdan sonra Morlinin evinin altında yerləşən qutuda aşkarlanıb. Morli birinci dərəcəli qətl, ağırlaşdırıcı hallarla müşayiət olunan qanunsuz evə daxilolma, sübutların saxtalaşdırılması, vandalizm və həbsdən yayınma ittihamları üzrə məhkum edilib.