Teatrşünas: “Gənc teatrşünaslar qonorar almalıdır”  

Azərbaycanda teatr tənqidinin inkişafı üçün KİV-də bu sahəyə ehtiyac yaradılmalı, gənc teatrşünaslar isə əməyinə görə qonorar almalıdır.

Citypost.az xəbər verir ki, bu sözləri Əməkdar incəsənət xadimi Aydın Talıbzadə Oxu.az-da jurnalist Əzizə İsmayılova ilə videomüsahibəsində deyib

A.Talıbzadə bildirib ki, tamaşalar tənqidə gəlmir: “Tamaşaya gedirsən, baxırsan, tamaşa tənqidə gəlmir. Bu gün birinci növbədə teatra tələbat olmalıdır tamaşaçıda. Bu, çox vacib məsələdir.”

Əməkdar incəsənət xadimi siyasətdən niyə danışdığını da izah edib: “Siyasi gündəmdə olan məsələlər insanlara hədsiz dərəcədə maraqlıdır. Amma teatr bu gün insanlarda o qədər də böyük maraq yarada bilmir. Və teatr tənqiddən daim nəsə gözləyir. Əslində, bu gün teatr tənqidi də bir neçə nəfərin çiynindədir.”

Teatr tənqidi ilə məşğul olanların əməyinin qiymətləndirilmədiyini bildirən A.Talıbzadə deyib: “Biz tənqidi yazılar yazırıq, amma bu yazılar kimə lazımdır? Teatra lazımdırmı? Bizim artıq yetmişə yaxın yaşımız var və yenə də sadəcə o entuziazmımıza arxalanıb yazılar yazırıq. Bu bizim hobbimizdir, peşəmizdir, sevdiyimiz bir nəsnədir. Buna görə biz qazanc əldə etmirik.”

O vurğulayıb ki, yeni nəslin teatr tənqidi ilə məşğul olması üçün bu sahəyə müəyyən kütləvi informasiya vasitələrində ehtiyac olmalıdır: “Onların da verilişləri olmalıdır, hansısa yerləri olmalıdır ki, çıxan tamaşaları işıqlandıra bilsinlər.”

Həmçinin oxuyun

Nazirlər Kabinetindən müəllimlərlə BAĞLI QƏRAR

SON DƏQİQƏ! Vəzifədən gedir

Məhkəmədən Ramiz Mehdiyevlə bağlı QƏRAR

Maşın sürən hər kəs BU XƏBƏRİ OXUSUN!

Gənc teatrşünasların qonorar almasının vacibliyini qeyd edən A.Talıbzadə bildirib: “Digər tərəfdən də, o gənc teatrşünaslar işləməlidirlər ki, pul qazansınlar. Teatr tənqidi ilə məşğul olan şəxslər heç bir qonorar almırlar. Yəni teatrşünaslığın inkişafı üçün birinci növbədə bu fərdləri yaşatmaq lazımdır.”

Əməkdar incəsənət xadimi aktyor portretlərinin yazılmamasından da narahatlığını dilə gətirib: “Siz təsəvvür edirsiniz, bu gün aktyorlarımızın çoxu səhnələrdə olsa da, onlar haqqında heç bir portret yazılmır. Amma bu, yazılmalıdır, aktyor özünü o portretlərdə görməlidir.”