AĞRIKƏSİCİLƏRƏ ALDANMAYIN! Həkimdən baş ağrısı ilə bağlı xəbərdarlıq

Baş ağrısı gündəlik həyatda ən çox rast gəlinən sağlamlıq problemlərindən biri olsa da, onun tez-tez təkrarlanması və qəbul edilən dərmanlara baxmayaraq keçməməsi ciddi yanaşma tələb edir. Bəzi insanlar baş ağrısı yarandıqda həkimə müraciət etmək əvəzinə, özbaşına ağrıkəsici dərman qəbul etməyə üstünlük verirlər. Lakin bu üsul ağrını müvəqqəti azaltsa da, onun yaranmasına səbəb olan əsas problemi aradan qaldırmır.

Terapevt-kardioloq Aytən Yüzbaşıyeva Citypost.az-a açıqlamasında bildirib ki, baş ağrısının müalicəsində ilk növbədə onun hansı səbəbdən yarandığı müəyyənləşdirilməlidir. Həkimin sözlərinə görə, baş ağrısını hər dəfə dərman vasitəsilə aradan qaldırmağa çalışmaq düzgün yanaşma deyil. Çünki ağrı orqanizmdə baş verən müəyyən dəyişikliklərin və ya sağlamlıq problemlərinin əlaməti ola bilər.

Həkim qeyd edib ki, baş ağrısının yaranmasına səbəb olan amillər müxtəlifdir. Bunlardan biri arterial təzyiqin yüksəlməsidir. Xüsusilə yüksək qan təzyiqi olan şəxslərdə baş ağrısı müşahidə edilə bilər. Ancaq hər baş ağrısını yüksək təzyiqlə əlaqələndirmək də doğru deyil. Bu səbəbdən ağrı zamanı arterial təzyiqin ölçülməsi və digər əlamətlərin də nəzərə alınması vacibdir.

Aytən Yüzbaşıyevanın sözlərinə görə, baş ağrısına səbəb olan digər amillərdən biri də boyun fəqərələri və boyun nahiyəsindəki problemlərdir. Uzun müddət kompüter qarşısında işləmək, düzgün olmayan vəziyyətdə oturmaq, boyun əzələlərinin gərginliyi və fəqərələrdəki müəyyən dəyişikliklər baş nahiyəsində ağrıların yaranmasına gətirib çıxara bilər. Belə hallarda ağrının xarakteri, hansı nahiyədə hiss olunması və nə zaman güclənməsi araşdırılmalıdır.

Həkim miqrenin də baş ağrılarının əsas səbəblərindən biri olduğunu diqqətə çatdırıb. Miqren zamanı ağrı bəzən başın bir tərəfində daha güclü hiss olunur, ürəkbulanma, işığa və səsə qarşı həssaslıqla müşayiət edilə bilər. Bu tip ağrılar adi baş ağrısından fərqləndiyi üçün düzgün diaqnozun qoyulması və uyğun müalicənin seçilməsi mühüm əhəmiyyət daşıyır.Bununla yanaşı, gündəlik həyat tərzi də baş ağrılarının yaranmasına təsir göstərir. Uzun müddət davam edən stress, əsəb gərginliyi, yuxu rejiminin pozulması, kifayət qədər yatmamaq, gün ərzində az su qəbul etmək və uzun müddət ac qalmaq baş ağrısına səbəb ola bilər. Bəzi hallarda isə yorğunluq, həddindən artıq fiziki və zehni yüklənmə də bu vəziyyəti ağırlaşdıra bilər.

Mütəxəssis vurğulayıb ki, baş ağrısı tez-tez təkrarlanırsa, əvvəlkindən daha şiddətli olursa və ya qəbul edilən ağrıkəsicilərə baxmayaraq davam edirsə, mütləq həkim müayinəsindən keçmək lazımdır. Xəstənin şikayətləri dinlənilməli, tibbi tarixçəsi araşdırılmalı, arterial təzyiqi yoxlanılmalı və ehtiyac olduğu halda əlavə müayinələr aparılmalıdır.

Həmçinin oxuyun

Leysan olacaq, şimşək çaxacaq - SABAHIN HAVASI

Milli Məclisin deputatı Rövşən Muradov:Bu nəticənin arxasında uzunmüddətli dövlət quruculuğu dayanır

Ərdoğan sabah Qarabağa gəlir

Nazirdən məktəblərlə bağlı MÜHÜM AÇIQLAMA

Onun sözlərinə görə, yalnız ağrının səbəbi müəyyən edildikdən sonra düzgün müalicə planı hazırlanmalıdır. Məsələn, problem arterial təzyiqlə bağlıdırsa, təzyiqin nəzarətdə saxlanılması, miqrenlə əlaqəlidirsə, miqrenə uyğun müalicənin seçilməsi, boyun nahiyəsindəki problemlərdən qaynaqlanırsa, həmin istiqamətdə müvafiq tədbirlərin görülməsi vacibdir. Stress və yuxu pozuntusu kimi amillər olduqda isə həyat tərzinin tənzimlənməsi də müalicənin mühüm hissəsini təşkil edir.

Aytən Yüzbaşıyeva əlavə edib ki, ağrıkəsici dərmanların tez-tez və həkim məsləhəti olmadan qəbulu da arzuolunmaz nəticələrə səbəb ola bilər. Belə ki, bəzi hallarda ağrıkəsicilərin həddindən artıq istifadəsi dərmanların yaratdığı əlavə baş ağrılarına – medikamentoz baş ağrısına gətirib çıxara bilər. Bu isə insanın ağrıkəsicilərdən daha çox istifadə etməsinə və problemin getdikcə dərinləşməsinə səbəb ola bilər.

Həkim baş ağrısı ilə bağlı bəzi hallarda təcili tibbi yardımın vacibliyini də diqqətə çatdırıb. Qəfil başlayan və çox şiddətli olan, həyatında ilk dəfə belə intensivlikdə hiss edilən baş ağrısı, yaxud ağrı ilə yanaşı nitq pozuntusu, görmədə dəyişiklik, qol və ayaqlarda zəiflik, huşun itməsi və yüksək hərarət kimi əlamətlər müşahidə olunarsa, vaxt itirmədən tibbi yardıma müraciət edilməlidir.

Həkim sonda bir daha vurğulayıb ki, baş ağrısını hər dəfə ağrıkəsici ilə ört-basdır etmək çıxış yolu deyil. Əsas məqsəd ağrını müvəqqəti dayandırmaq yox, onun yaranma səbəbini müəyyənləşdirmək və həmin səbəbə uyğun müalicə aparmaqdır. Baş ağrısı orqanizmin verdiyi bir siqnal kimi qiymətləndirilməli, xüsusilə davamlı və təkrarlanan ağrılar diqqətdən kənarda qalmamalıdır.

Əli