X.Cəfərli: “Müsəlman Qardaşları” Azərbaycanda təşkilatlanmağa çalışır

Təxminən bir il öncə yazdığım “Siyasi islamın ləğvinə start verilir” başlıqlı bir yazıda  Prezident Donald Trampın “Müsəlman Qardaşları” şəbəkəsinin bəzi şöbələrinin xarici terror təşkilatları və qlobal terrorçular siyahısına daxil edilməsi prosedurunun başladılması ilə bağlı imzaladığı sərəncamın təsadüfi hadisə olmadığına diqqət çəkmək istəmişdim. Son günlər baş verən hadisələr qənaətlərimin yanlış olmadığını göstərir.  

Qahirə Cinayət Məhkəməsi aralarında “Avropa Müsəlmanları Şurası”, “Fətva və Tədqiqat üzrə Avropa Şurası, “İmamlar Şurası”, “Müsəlman Ailələri üzrə Avropa Şurası”, “Müsəlman Qadınlar üzrə Avropa Şurası”, “Avropa Quran Şurası”, “İslam Tələbələrinin Avropa Forumu”, “Avropa Humanitar Elmlər İnstitutu (müxtəlif filialları da daxil olmaqla)”, “Fransa Müsəlmanları Fondu”, “Böyük Britaniya Müsəlman Assosiasiyası”, “İsveçrə Müsəlman Liqası”, “Almaniya İslam Assambleyası”, eləcə də İsveç və İtaliyadakı  müsəlman birlikləri daxil olmaqla 35 təşkilat və 36 şəxsi terror təşkilatları siyahısına daxil edib. 

Qahirə Cinayət Məhkəməsinin terrorçular sırasına daxil etdiyi 36 şəxs arasında “The Cordoba Foundation” Mərkəzinin qurucusu Ənəs Usama Tofiq əl-Tikriti, “Müsəlman qardaşları” Avropa şəbəkəsinin maliyyə naziri adlandırılan İbrahim Faruk Məhəmməd əl-Zayyat, “Müsəlman qardaşları” Avropa şəbəkəsinin rəhbərlərindən hesab olunan Əbdül Əziz Məhəmməd Əbdül Əziz İbrahim (Həmzə Korkmaz) və Hüseyn Məhəmməd Məhəmməd Məhəmməd Halava, Müsəlman qardaşları” şəbəkəsinin Rusiyadakı liderlərindən biri Vissam əl-Bərdəvilin də adı var. 

Qahirə Cinayət Məhkəməsinin “Müsəlman qardaşları” şəbəkəsinə qarşı bu qədər geniş miqyaslı və əhatəli hüquqi qərarın çox böyük təsir doğuracağını proqnozlaşdırmaq çətin deyil. 

Qənaətimcə, İran və onun terror şəbəkəsi ilə bağlı problemlər həll olunduqdan sonra “Müsəlman qardaşları” şəbəkəsinə qarşı çox geniş miqyaslı cəza tədbirlərinin görüləcəyini proqnozlaşdırmaq çətin deyil. Qərb ölkələri ilə yanaşı Çin, Hindistan, Rusiya, İsrail və əksər ərəb ölkələrinin bu prosesdə yer alacağı ehtimalı yüksəkdir. 

Nazirlər Kabinetinin 21 sentyabr 2026-cı il tarixli 309 nömrəli qərarı təhsilalanların müəyyən edilmiş geyim formasının vahidliyini pozan, habelə ümumi təhsilin dünyəvilik prinsipinə uyğun olmayan digər geyim elementlərini qadağan etməsinə qarşı xaricdən başladılan sərt reaksiyanın arxasında “Müsəlman qardaşları” şəbəkəsinin dayandığına şübhə etmirəm. Bu şəbəkənin Azərbaycan cəmiyyətində də şəbəkələşdiyini düşünməyə əsas verən məqamlar var. Təhlillər göstərir ki, Səudiyyə Ərəbistanı Krallığının vəliəhdi Məhəmməd bin Salman 2022-ci ildə “mötədil islam”a qayıtdıqlarını bəyan edərək “vəhabilik”liyin dövlət ideologiyasında və dini həyatında rolunu kəskin şəkildə azaldan qərarından sonra bu təriqqətin bütün dünyada, o cümlədən də Azərbaycanda mövqeləri zəifləyib. Öncə fetocuların, ardınca da “vəhabilər”in siyasi himayədən məhrum olmasından sonra yaranmış boşluğu “Erengöy cemmatı”, “Menzil cemmatı”, “İsmailağa cemmatı” və digər dini təşkilatların simasında Azərbaycanda təşkilatlanmağa çalışan “Müsəlman qardaşları” doldurmağa çalışır. Bu gün Azərbaycanda qeyri-ənənəvi təriqətlər içərisində ən güclüsünün və ən radikalının “Müsəlman qardaşları” olduğu ehtimal olunur. 

Qahirə Cinayət Məhkəməsinin “Müsəlman Qardaşları” şəbəkəsinə qarşı qərarı, “hicab” ətrafında yaradılmış xarici təsirli etiraz hərəkətləri göstərir ki, “Müsəlman Qardaşları” şəbəkəsinin Azərbaycanda terror təşkilatı kimi tanınmasının zamanı çatıb. Əgər, bu addımı atmasaq öncə Azərbaycanın etno-mədəni, daha sonra isə siyasi kimliyini məhv etməyi hədəfləyən terror şəbəkəsinin bədnam planlarının qarşısını almaq çətin olacaq. 

Xəqani Cəfərli

Politoloq

Həmçinin oxuyun

Erməni mediası arqumentlərdən niyə çəkinir?

Tanınmış sənətçimiz qəfil VƏFAT ETDİ

9 gün iş olmayacaq- TƏQVİM

7 gün dərs olmayacaq- TARİXLƏR