İnsultdan əvvəl hansı xəbərdarlıq əlamətləri yaranır? – Nevroloqdan ciddi xəbərdarlıq

İnsult dünyada ölüm və əlilliyə səbəb olan ən ciddi sağlamlıq problemlərindən biridir. Bu xəstəlik zamanı beynin müəyyən hissəsinə qan axını qəfil pozulur və nəticədə beyin hüceyrələri oksigen çatışmazlığı ilə üzləşir. İnsultun təhlükəli tərəflərindən biri isə onun hər zaman heç bir xəbərdarlıq olmadan baş verməməsidir. Bəzi hallarda əsas hadisədən əvvəl orqanizm müəyyən siqnallar verir. Lakin bu əlamətlər qısa müddətdə aradan qalxdığı üçün insanlar çox vaxt onları ciddi qəbul etmir, həkimə müraciəti təxirə salırlar.

Uzman nevroloq Nailə Ələkbərova Citypost.az-a açıqlamasında bildirib ki, insultdan əvvəl yaranan bəzi əlamətlərə xüsusi diqqət yetirilməlidir. Onun sözlərinə görə, bu simptomlar bir neçə dəqiqə və ya saat davam etdikdən sonra heç bir müdaxilə olmadan keçə bilər. Məhz əlamətlərin öz-özünə aradan qalxması insanlarda yanlış arxayınlıq yaradır və onlar tibbi yardım almağa ehtiyac olmadığını düşünürlər.

Nevroloq qeyd edib ki, xüsusilə qəfil başlayan və qısa müddətdə keçib gedən nevroloji əlamətlər təhlükəli xəbərdarlıq hesab edilməlidir. Belə hallarda insanın bədəninin bir tərəfində keyimə, hissiyyat itkisi və ya gücsüzlük yarana bilər. Məsələn, qolun və ya ayağın qəfil zəifləməsi, əşyaları tutmaqda çətinlik çəkmək, üzün bir tərəfində əyrilik və ya hissiyyatın dəyişməsi diqqətdən kənarda qalmamalıdır.

A.N. Ələkbərovanın sözlərinə görə, danışıqda qəfil dəyişiklik də insultun mühüm xəbərdarlıq əlamətlərindəndir. İnsan sözləri düzgün ifadə edə bilməyə, danışarkən çətinlik çəkə, deyilənləri anlamaqda problem yaşaya bilər. Bəzən nitq qısa müddət ərzində normallaşır və pasiyent əvvəlki vəziyyətinə qayıdır. Lakin bu, təhlükənin sovuşduğu anlamına gəlmir. Nitqin qəfil pozulması, hətta bir neçə dəqiqədən sonra tamamilə düzəlsə belə, təcili tibbi qiymətləndirmə tələb edir.

Nevroloq görmə ilə bağlı dəyişikliklərin də ciddi siqnal ola biləcəyini diqqətə çatdırıb. Qəfil görmə bulanıqlığı, bir və ya hər iki gözdə görmənin zəifləməsi, göz qaralması və görmə sahəsinin müəyyən hissəsinin itməsi beyin qan dövranı pozğunluqları ilə əlaqəli ola bilər. Bu əlamətlər qısa müddət davam edib keçdikdə belə, onları adi yorğunluq və ya təzyiq dəyişməsi ilə əlaqələndirərək gözardı etmək düzgün deyil.

Bundan başqa, qəfil başlayan və əvvəlkilərdən fərqlənən güclü baş ağrısı da diqqət tələb edir. Xüsusilə ağrı saniyələr və ya dəqiqələr ərzində çox şiddətli həddə çatırsa, buna ürəkbulanma, qusma, huşun dəyişməsi və ya digər nevroloji əlamətlər qoşulursa, təcili tibbi yardım çağırılmalıdır. Baş ağrısının hər növü insult əlaməti olmasa da, qəfil və qeyri-adi xarakter daşıyan ağrılar ciddi səbəblərdən qaynaqlana bilər.

Mütəxəssisin diqqət çəkdiyi əsas məqamlardan biri də keçici işemik həmlədir. Bu vəziyyət zamanı beynin müəyyən hissəsinə qan axını müvəqqəti olaraq azalır və insultu xatırladan əlamətlər meydana çıxır. Simptomlar bir neçə dəqiqə və ya saat ərzində aradan qalxa bilər. Lakin keçici işemik həmlə gələcək insult riskinin mühüm xəbərdarlıq göstəricisi hesab olunur. Əlamətlərin keçməsi beynin təhlükədən tamamilə xilas olması demək deyil.

Həmçinin oxuyun

İlham Əliyevin adından saxta məlumat YAYILIR -DİQQƏT!

Quşlar yüksək gərginlikli elektrik xətlərində dayanır-Bəs niyə elektrik onları vurmur?

Qatarla gedənlərə ŞAD XƏBƏR!Bilet ucuzlaşdı

Prezidentin Mətbuat Xidməti MƏLUMAT YAYDI

Nailə Ələkbərova vurğulayıb ki, belə simptomlar müşahidə edildikdə insanın özünü yaxşı hiss etməsini gözləmək və ya vəziyyətin təkrar baş verməyəcəyini düşünmək təhlükəlidir. Xüsusilə bədənin bir tərəfində qəfil zəiflik, üzün əyilməsi, nitqin pozulması və görmə dəyişiklikləri yaranarsa, dərhal təcili tibbi yardım çağırılmalıdır. Əlamətlərin başladığı vaxtı qeyd etmək də vacibdir, çünki bu məlumat müalicə taktikasının müəyyənləşdirilməsində həkimlər üçün əhəmiyyət daşıyır.

Nevroloq onu da bildirib ki, insult riskini artıran amillərə yüksək arterial təzyiq, şəkərli diabet, qanda xolesterinin yüksək olması, ürək ritm pozğunluqları, siqaret istifadəsi, artıq çəki və fiziki hərəkətsizlik daxildir. Bu risk faktorlarının nəzarətdə saxlanılması insultun qarşısının alınmasında mühüm rol oynayır. Xüsusilə yüksək təzyiqi olan şəxslər mütəmadi müayinədən keçməli, təyin edilmiş müalicəni həkim göstərişinə uyğun davam etdirməlidirlər.

Həkimin sözlərinə görə, insultun qarşısının alınmasında ən vacib məsələlərdən biri orqanizmin verdiyi xəbərdarlıq siqnallarını vaxtında tanımaqdır. Bir neçə dəqiqəyə keçən keyimə, danışıq pozuntusu və ya görmə problemi belə adi hal kimi qəbul edilməməlidir. Bu əlamətlər keçici işemik həmlənin göstəricisi ola bilər və sonrakı insult riskinin qiymətləndirilməsi üçün təcili tibbi müayinə tələb edir.

Beləliklə, insultun ilk əlamətlərini tanımaq və vaxt itirmədən tibbi yardım almaq insan həyatının xilas edilməsində həlledici əhəmiyyət daşıyır. Əlamətlərin öz-özünə keçməsini gözləmək olmaz. İnsultdan şübhələnilən hər bir vəziyyətdə dərhal 103 və ya 112 nömrəsinə zəng etmək lazımdır.

Əli