Eynəkdən birdəfəlik xilas olmaq istəyənlərə xəbərdarlıq: Hər kəs göz əməliyyatı etdirə bilməz

Eynəkdən və kontakt linzalardan imtina etmək istəyən bir çox insan görmə problemlərini aradan qaldırmaq üçün lazer əməliyyatına üz tutur. Lakin görmə qüsurunun olması və eynəkdən istifadə edilməsi əməliyyat üçün hər zaman kifayət etmir. Bu zaman gözün anatomik quruluşu, buynuz qişanın vəziyyəti, göz nömrələrinin sabitliyi və göz dibinin sağlamlığı əsas rol oynayır. Bəs kimlər göz əməliyyatı etdirə bilər, prosedur üçün ən uyğun yaş hansıdır və əməliyyatdan əvvəl hansı müayinələr aparılmalıdır?

Oftalmoloq Sevinc Camıyeva Citypost.az-a açıqlamasında bildirib ki, eynək istifadə edən hər bir şəxs görmə qüsurunu aradan qaldırmaq məqsədilə əməliyyat oluna bilməz. Onun sözlərinə görə, lazer əməliyyatına qərar verilməzdən əvvəl xəstənin gözləri ətraflı müayinə edilməli, əməliyyatın mümkünlüyü və təhlükəsizliyi qiymətləndirilməlidir.

Həkim qeyd edib ki, ilkin mərhələdə buynuz qişanın topoqrafiyası aparılır. Bu müayinə buynuz qişanın səthinin formasını, əyriliyini və digər mühüm xüsusiyyətlərini qiymətləndirməyə imkan verir. Əməliyyatın növündən asılı olaraq buynuz qişanın qalınlığı və digər göstəriciləri də nəzərə alınır. Çünki lazer prosedurları zamanı buynuz qişada müəyyən dəyişikliklər edilir və onun quruluşunun əməliyyat üçün uyğun olması vacib şərtlərdən biridir.

Sevinc Camıyevanın sözlərinə görə, müayinə zamanı xəstənin görmə qüsurunun dərəcəsi də müəyyənləşdirilir. Yaxıngörmə, uzaqgörmə və astiqmatizm kimi problemlərin səviyyəsi, eləcə də göz nömrələrinin zamanla dəyişib-dəyişməməsi əməliyyat qərarına təsir göstərir. Əgər göstəricilər əməliyyat üçün uyğundursa, növbəti mərhələdə digər müayinələr aparılır.

Həkim bildirib ki, göz dibinin müayinəsi də əməliyyatdan əvvəl diqqət yetirilməli olan mühüm mərhələlərdəndir. Bu müayinə zamanı torlu qişanın və gözün digər daxili strukturlarının vəziyyəti qiymətləndirilir, əməliyyata təsir göstərə biləcək problemlərin olub-olmadığı araşdırılır. Xüsusilə yüksək dərəcəli yaxıngörməsi olan şəxslərdə torlu qişanın vəziyyətinin yoxlanılması mühüm əhəmiyyət daşıyır.

Oftalmoloq vurğulayıb ki, bütün müayinələrin nəticələri birlikdə qiymətləndirildikdən sonra əməliyyatın mümkünlüyü barədə qərar verilir. Yəni yalnız eynək nömrəsinin uyğun olması kifayət deyil. Buynuz qişanın vəziyyəti, göz dibində hər hansı patologiyanın mövcudluğu, xəstənin ümumi göz sağlamlığı və digər risk amilləri də nəzərə alınmalıdır. Bəzi hallarda lazer əməliyyatı uyğun hesab edilməyə bilər və xəstə üçün alternativ görmə korreksiyası üsulları seçilə bilər.

Əməliyyat üçün ən uyğun yaş hansıdır?

Sevinc Camıyeva göz əməliyyatı üçün hamıya şamil edilən konkret ideal yaşın olmadığını bildirib. Onun sözlərinə görə, bir çox insanda göz nömrələri 18 yaş ətrafında sabitləşməyə başlasa da, bu proses bütün şəxslərdə eyni vaxtda baş vermir. Bəzi insanlarda görmə qüsuru 19, 20, 21 yaşlarında və daha sonrakı dövrlərdə də dəyişə bilər.

Həkim qeyd edib ki, göz nömrələri sabitləşmədən əməliyyat aparılması arzuolunmaz nəticələrə səbəb ola bilər. Belə ki, prosedurdan sonra görmə qüsuru yenidən arta və insana təkrar eynəkdən istifadə etmək lazım gələ bilər. Bu səbəbdən yalnız yaş göstəricisinə əsaslanaraq əməliyyat qərarı vermək düzgün deyil.

Həmçinin oxuyun

Məşhur filmdəki aktrisa “Lotu Bəxtiyar”ın anası imiş – FOTO

Anar Bayramovun nazirliyə gətirdiyi KADR KİMDİR?

Mir Şahindən SƏRT SÖZLƏR

Ramizin qızı HARDADIR?

Oftalmoloqun sözlərinə görə, əməliyyata hazırlıq zamanı son altı ay ərzində göz nömrələrinin dəyişib-dəyişmədiyi xüsusi diqqətlə qiymətləndirilməlidir. Əgər bu müddət ərzində göstəricilər sabit qalıbsa və digər müayinələr də müsbət nəticə verirsə, əməliyyatın mümkünlüyü nəzərdən keçirilə bilər. Bununla belə, bəzi hallarda daha uzun müddətli sabitlik tələb oluna bilər və yekun qərar fərdi müayinə əsasında verilməlidir.

Sevinc Camıyeva bildirib ki, xəstələrin özbaşına əməliyyat qərarı verməsi və ya yalnız tanışlarının təcrübəsinə əsaslanması düzgün yanaşma deyil. Hər bir insanın göz quruluşu və görmə qüsurunun xüsusiyyətləri fərqli olduğundan, bir şəxs üçün uğurlu olan prosedur başqa bir şəxsə uyğun gəlməyə bilər. Buna görə də əməliyyatdan əvvəl ətraflı oftalmoloji müayinədən keçmək və həkimin tövsiyələrini nəzərə almaq vacibdir.

50 yaşında eynək istifadə edən şəxslər də əməliyyat oluna bilərmi?

Yaşla bağlı digər mühüm məqam 50 yaş və daha yuxarı dövrdə eynək istifadə edən şəxslərin əməliyyat imkanlarıdır. Bu yaşda görmə problemi yalnız yaxıngörmə və ya uzaqgörmə ilə əlaqəli olmaya bilər. Presbiopiya, yəni yaş artdıqca yaxın məsafədə görmənin çətinləşməsi, eləcə də katarakta kimi problemlər də nəzərə alınmalıdır.

Belə hallarda əməliyyatın növü xəstənin görmə ehtiyaclarından və gözün ümumi vəziyyətindən asılı olaraq müəyyənləşdirilir. Bəzi şəxslərdə lazer korreksiyası uyğun ola bilər, digərlərində isə fərqli müalicə və ya cərrahi üsullar nəzərdən keçirilə bilər. Buna görə də 50 yaşında eynək istifadə etmək özlüyündə əməliyyata maneə sayılmadığı kimi, həmin yaşda olmaq da əməliyyatın mütləq mümkün olduğu anlamına gəlmir.

Nəticə etibarilə, eynəkdən xilas olmaq istəyən şəxslər üçün əsas meyar yalnız yaş və ya göz nömrəsinin dərəcəsi deyil. Buynuz qişanın quruluşu, göz dibinin vəziyyəti, görmə göstəricilərinin sabitliyi və digər tibbi amillər birlikdə qiymətləndirilməlidir. Əməliyyatın uyğunluğu barədə qərar yalnız müvafiq müayinələrdən sonra oftalmoloq tərəfindən verilməlidir.

Əli