Tapdıq Fərhadoğlu: “ABŞ-də yeni siyasi balans Ukrayna və Azərbaycan üçün ciddi nəticələr doğura bilər”

Jurnalist Tapdıq Fərhadoğlu ABŞ-də keçirilən aralıq seçkilərin nəticələrini və onların beynəlxalq siyasətə, xüsusilə İran, Ukrayna və Cənubi Qafqaz regionuna mümkün təsirlərini təhlil edib.

Citypost.az xəbər verir ki, jurnalist sosial şəbəkə hesabında geniş təhlilini paylaşaraq Konqresin hər iki palatasında Demokratların nəzarəti ələ keçirməsinin Donald Tramp administrasiyasının siyasi imkanlarına təsir göstərə biləcəyini bildirib.

Tapdıq Fərhadoğlunun fikrincə, yeni siyasi balans Ağ Evin xarici siyasət təşəbbüslərinin həyata keçirilməsində müəyyən çətinliklər yarada bilər. Xüsusilə İranla müharibə, Ukrayna ilə bağlı danışıqlar və Azərbaycan-Ermənistan münasibətlərində Vaşinqtonun vasitəçiliyi baxımından Konqresin mövqeyi əhəmiyyətli olacaq.

Təhlildə Ukrayna məsələsinə də geniş yer ayrılıb. Tapdıq Fərhadoğlu ABŞ-nin vasitəçiliyi ilə keçirilməsi planlaşdırılan danışıqların nəticələrinin yeni siyasi şəraitdə xüsusi əhəmiyyət daşıyacağını vurğulayıb. O hesab edir ki, Demokratların Konqresdə üstünlük əldə etməsi Ukraynaya maliyyə və hərbi dəstəyin artırılması istiqamətində yeni imkanlar yarada bilər. Bununla yanaşı, silah tədarükü və sanksiyalarla bağlı əsas qərarların icra hakimiyyətindən də asılı olduğunu xatırladıb.

Jurnalist Azərbaycan-ABŞ münasibətlərinin gələcəyini də təhlil edib. Onun fikrincə, Konqresdə siyasi qüvvələr nisbətinin dəyişməsi Vaşinqtonun Bakıya münasibətində müəyyən siyasi təzyiqlərə səbəb ola bilər. Xüsusilə 907-ci düzəliş, müdafiə əməkdaşlığı və Strateji Tərəfdaşlıq Xartiyasının icrası qarşıdakı dövrdə diqqət mərkəzində olacaq.

Tapdıq Fərhadoğlu hesab edir ki, ABŞ-də yeni siyasi balans Azərbaycan-Ermənistan münasibətlərinə və sülh prosesinə də təsirsiz ötüşməyəcək. Demokratların Ermənistanla bağlı mövqeyi, eləcə də Konqresdəki müzakirələr Vaşinqtonun Cənubi Qafqaz siyasətində yeni yanaşmaların ortaya çıxmasına səbəb ola bilər.

Təhlildə TRIPP layihəsinin gələcək taleyinə də toxunulub. Jurnalist bildirib ki, layihənin siyasi və hüquqi əsasları formalaşsa da, korporativ mexanizmlərin tamamlanması və tikinti mərhələsinə keçid hələ də mühüm məsələlərdəndir. Onun fikrincə, ABŞ-dəki siyasi dəyişikliklər layihənin birbaşa dayandırılmasına səbəb olmasa da, maliyyələşmə və təhlükəsizlik təminatları ilə bağlı əlavə şərtlər yarada bilər.

Həmçinin oxuyun

Sərəncam bu  gündən qüvvəyə minir

İlham Əliyevin adından saxta məlumat YAYILIR -DİQQƏT!

Quşlar yüksək gərginlikli elektrik xətlərində dayanır-Bəs niyə elektrik onları vurmur?

Qatarla gedənlərə ŞAD XƏBƏR!Bilet ucuzlaşdı

Müəllif regionun gələcək inkişafı ilə bağlı bir neçə mümkün ssenarini də nəzərdən keçirib. Bunlara ABŞ administrasiyası ilə Konqres arasında siyasi kompromis, Vaşinqtonda qarşıdurmanın dərinləşməsi və xarici siyasətdə daha institusional qərarvermə modelinə keçid daxildir.

Tapdıq Fərhadoğlunun qənaətinə görə, Azərbaycanın əsas prioriteti Vaşinqtonla münasibətləri yalnız bir siyasi partiya və ya konkret prezidentin fəaliyyəti üzərində qurulmamalıdır. Bakı həm Ağ Evlə mövcud tərəfdaşlığı qoruyub saxlamalı, həm də Konqresin Demokrat qanadı və ABŞ-nin təhlükəsizlik institutları ilə dialoqu genişləndirməlidir.

Jurnalist hesab edir ki, 2027-ci il Azərbaycan üçün ABŞ ilə münasibətlərin yeni siyasi şəraitdə davamlılığının, enerji və nəqliyyat əməkdaşlığının, eləcə də regional təhlükəsizlik maraqlarının qorunmasının mühüm sınağı olacaq.